പത്തനംതിട്ട: ശബരിമലയില്‍ ആക്ടിവിസ്റ്റുകള്‍ക്ക് സുരക്ഷ നല്‍കാന്‍ കഴിയില്ലെന്ന് പൊലിസ്. സന്നിധാനത്തെ പൊലിസ് ഡി.ജി.പിക്ക് നല്‍കിയ റിപ്പോര്‍ട്ടിലാണ് കഴിഞ്ഞദിവസങ്ങളിലെ സംഭവങ്ങള്‍ ചൂണ്ടിക്കാണിച്ച് റിപ്പോര്‍ട്ട് നല്‍കിയത്.

ക്രിമിനല്‍ പശ്ചാത്തലമുള്ള യുവതികളെ മല കയറാന്‍ അനുവദിക്കില്ലെന്നും ഇത്തരക്കാരെ തിരിച്ചയയ്ക്കാന്‍ അനുവദിക്കണമെന്നും റിപ്പോര്‍ട്ടില്‍ പറയുന്നു. ശബരിമലയില്‍ പല യുവതികളും എത്തുന്നത് പ്രശസ്തിക്ക് വേണ്ടിയാണെന്നും റിപ്പോര്‍ട്ടിലുണ്ട്.

തിങ്കളാഴ്ച ശബരിമല കയറാനെത്തിയ ബിന്ദുവിന് ക്രിമിനല്‍ പശ്ചാത്തലമുണ്ട്. തിരക്ക് വര്‍ധിച്ചതിനാല്‍ വരുംദിവസങ്ങളില്‍ യുവതികളെത്തിയാല്‍ സ്ഥിതി ഗുരുതരമാകും.

തിരക്കിനിടയില്‍ സുരക്ഷ ഒരുക്കാനാകില്ലെന്നും തിരക്ക് ഒഴിയുമ്പോള്‍ മറ്റൊരു ദിവസം സുരക്ഷ ഒരുക്കാമെന്നും യുവതികളെ കഴിഞ്ഞദിവസം പൊലിസ് അറിയിച്ചിരുന്നു.