ന്യൂഡല്‍ഹി: മൂന്ന് സംസ്ഥാന നിയമസഭാ തെരഞ്ഞെടുപ്പില്‍ തിരിച്ചടി നേരിട്ടത്തോടെ അടുത്ത വര്‍ഷത്തെ വിദേശ പര്യടനം വരെ വേണ്ടെന്നു വെക്കാന്‍ തയ്യാറായിരിക്കുകയാണ് പ്രധാനമന്ത്രി. പകരം അടുത്ത ലോക്‌സഭാ തെരഞ്ഞെടുപ്പില്‍ ശ്രദ്ധയൂന്നാനാണ് തീരുമാനം. 2019ലെ ആദ്യ നാല് മാസങ്ങളില്‍ പ്രധാനമന്ത്രി വിദേശരാജ്യങ്ങളിലൊന്നും സന്ദര്‍ശനം നടത്തില്ലെന്ന് സര്‍ക്കാര്‍ ഉദ്യോഗസ്ഥരെ ഉദ്ധരിച്ച് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. പ്രധാനമന്ത്രിയെന്ന നിലയില്‍ നിര്‍ബന്ധമായി പങ്കെടുക്കേണ്ട ചടങ്ങുകള്‍ ഇല്ലാത്തതിനാലാണ് വിദേശ പര്യടനം മാറ്റിവച്ചതെന്നാണ് നല്‍കുന്ന വിശദീകരണം.

കഴിഞ്ഞ വര്‍ഷം 14 തവണയാണ് മോദി വിദേശസന്ദര്‍ശനം നടത്തിയത്. ലോകത്തെ പ്രമുഖ രാജ്യങ്ങളിലെല്ലാം തന്നെ മോദി ഈ നാലരവര്‍ഷം കൊണ്ട് എത്തിയിരുന്നു. വിദേശ മന്ത്രാലയത്തിന്റെ കണക്കുപ്രകാരം അദ്ദേഹം 84 രാജ്യങ്ങളാണ് സന്ദര്‍ശിച്ചത്.

അധികാരത്തിലെത്തിയ ശേഷം വിദേശ രാജ്യങ്ങളില്‍ ചുറ്റാനായി മാത്രം മോദി 2000 കോടി രൂപ ചെലവിട്ടെന്ന് പാര്‍ലമെന്റിലെ ചോദ്യോത്തര വേളയില്‍ മന്ത്രി വി.കെ സിങ് വെളിപെടുത്തിയിരുന്നു. നേരത്തെ, വിവരാവകാശ നിയമ പ്രകാരമുള്ള മോദിയുടെ യാത്രയുമായി ബന്ധപ്പെട്ട ചെലവുകളെ കുറിച്ചുള്ള ചോദ്യങ്ങള്‍ക്ക് പ്രധാനമന്ത്രിയുടെ ഓഫീസ് കൃത്യമായ മറുപടി നല്‍കിയിരുന്നില്ല. തുടര്‍ച്ചയായി മോദി നടത്തുന്ന വിദേശസന്ദര്‍ശനത്തിനെതിരെ പ്രതിപക്ഷവും രംഗത്തെത്തിയിരുന്നു.

ഇക്കഴിഞ്ഞ അഞ്ച് നിയമസഭാ തെരഞ്ഞെടുപ്പുകളില്‍ ബി.ജെ.പിയുടെ പ്രധാന പ്രാസംഗികനായിരുന്നു മോദി. അതേസമയം മോദി പ്രചരണം നടത്തിയ 70 ശതമാനത്തിലേറെ മണ്ഡലങ്ങളിലും ബി.ജെ.പി പരാജയപ്പെട്ടിരുന്നു. രാജസ്ഥാനിലും മധ്യപ്രദേശിലും ഛത്തീസ്ഗഢിലും ബി.ജെ.പിയെ പരാജയപ്പെടുത്തി കോണ്‍ഗ്രസ് അധികാരത്തിലെത്തുകയും ചെയ്തിരുന്നു.

മൂന്നിടത്തും കാര്‍ഷിക പ്രതിസന്ധിയും തൊഴിലില്ലായ്മയുമാണ് ബി.ജെ.പിയ്ക്ക് തിരിച്ചടിയായത്. ഇതിന്റെ പശ്ചാത്തലത്തില്‍ ഈ വിഷയങ്ങളിലൂന്നിയുള്ള പ്രചരണത്തിനാണ് ബി.ജെ.പി ശ്രമിക്കുന്നത്.

കൂടാതെ, വിശാല പ്രതിപക്ഷ ഐക്യം രൂപപ്പെടുന്നതും ബി.ജെ.പിയ്ക്ക് തിരിച്ചടിയാകുമെന്നാണ് പാര്‍ട്ടിയുടെ കണക്കുകൂട്ടല്‍.