റിയോ ഡി ജനീറോ: ഇന്ത്യന്‍ പ്രതീക്ഷകള്‍ വാനോളം ഉയര്‍ത്തി അമ്പെയ്ത്ത് വ്യക്തിഗത വിഭാഗത്തില്‍ ബൊംബെയ്‌ല ദേവി പ്രീ ക്വാര്‍ട്ടറില്‍ കടന്നു. ചൈനീസ് തായ് പേയ് താരം ലിന്‍ ഷി ചിയായെയാണ് ബൊംബെയ്‌ല ദേവി പരാജയപ്പെടുത്തിയത്. സ്‌കോര്‍ 6-2.

ടീമിനത്തില്‍ വന്ന പിഴവുകള്‍ തിരുത്തിയ ബൊംബെയ്‌ല മികവോടെയാണ് തായ് പേയ് താരത്തിനെതിരേ മത്സരിച്ചത്. അവസാന സെറ്റില്‍ മാത്രമാണ് തിരിച്ചടി നേരിട്ടത്. മൂന്നാം സെറ്റില്‍ തിരിച്ചടിച്ച തായ് പേയ് താരം 27-26നാണ് സെറ്റ് സ്വന്തമാക്കിയത്. എന്നാല്‍ നേരത്തെയുള്ള സെറ്റുകളില്‍ 27-24, 27-24, 23-28, 27-23 എന്ന സ്‌കോറില്‍ ബൊംബെയ്‌ല ജയിച്ചിരുന്നു. മത്സരത്തിന്റെ തുടക്കത്തില്‍ തിരിച്ചടി നേരിട്ട ബൊംബെയ്‌ലയ്ക്ക് പക്ഷേ 27-24ന് ആദ്യ സെറ്റ് സ്വന്തമാക്കാന്‍ സാധിച്ചു. കാറ്റിന്റെ ഗതി പ്രതികൂലമായത് താരത്തിന് തടസം സൃഷ്ടിച്ചു. ആദ്യ രണ്ടു ഷോട്ടില്‍ 10, എട്ട് എന്നിങ്ങനെ സ്‌കോര്‍ ചെയ്ത ബൊംബെയ്‌ല സെറ്റ് നഷ്ടമാവില്ലെന്ന് ഉറപ്പിച്ചു.

രണ്ടാം സെറ്റില്‍ ആദ്യ രണ്ടു ഷോട്ടുകളില്‍ 10, ഒന്‍പത് സ്‌കോര്‍ സ്വന്തമാക്കി ബൊംബെയ്‌ല എതിരാളിയെ സമ്മര്‍ദത്തിലാക്കി. രണ്ടാം സെറ്റ് അവസാനിക്കുമ്പോള്‍ 27 പോയിന്റ് സ്വന്തമാക്കിയ ബൊംബെയ്‌ല ലീഡ് ഉയര്‍ത്തി. മൂന്നാം സെറ്റില്‍ തായ് പേയ് താരം തിരിച്ചടിച്ചു.
താരം സെറ്റ് സ്വന്തമാക്കിയെങ്കിലും വൈകിപോയിരുന്നു. അടുത്ത റൗണ്ട് സ്വന്തമാക്കി ബൊംബെയ്‌ല മത്സരം സ്വന്തമാക്കുകയായിരുന്നു. നാളെ നടക്കുന്ന പ്രീ ക്വാര്‍ട്ടറില്‍ മെക്‌സിക്കോയുടെ അലക്‌സാന്ദ്ര വലന്‍സിയയാണ് ബൊംബെയ്‌ലയ്ക്ക് എതിരാളി.