കോട്ടയം: കുരുന്നു ഭാവനയ്ക്കു നിറം പകര്‍ന്ന് 24-ാമത് ദര്‍ശന അഖില കേരള ശങ്കേഴ്‌സ് ചിത്രരചന കാര്‍ട്ടൂണ്‍ മല്‍സരം. ദര്‍ശന സാംസ്‌കാരിക കേന്ദ്രം ന്യൂഡല്‍ഹി ചില്‍ഡ്രന്‍സ് ബുക്ക് ട്രസ്റ്റുമായി ചേര്‍ന്ന് സംഘടിപ്പിച്ച കാര്‍ട്ടൂണ്‍ മത്സരങ്ങളുടെ ഒന്നാം ദിവസം വര്‍ണ്ണാഭമായി.
രാവിലെ മുതല്‍ കേരളത്തിലെ വിവിധ ഭാഗങ്ങളില്‍ നിന്ന് മത്സരത്തില്‍ പങ്കെടുക്കാന്‍ കുട്ടികള്‍ എത്തിയിരുന്നു. തിരുവഞ്ചൂര്‍ രാധാകൃഷ്ണന്‍ എം.എല്‍.എ ചിത്രം വരച്ച് മത്സരം ഉദ്ഘാടനം ചെയ്തു. ആര്‍ട്ടിസ്റ്റ് അശോകന്‍, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ.ജസ്റ്റിന്‍ കാളിയാനിയില്‍ സി.എം.ഐ, കാര്‍ട്ടൂണിസ്റ്റ് രാജു നായര്‍ സംസാരിച്ചു.
മത്സരത്തില്‍ നഴ്‌സറി, സ്‌പെഷല്‍ സ്‌കൂള്‍ കുട്ടികള്‍ക്ക് കളറിങും ഒന്നും രണ്ടും ക്ലാസിലെ കുട്ടികള്‍ക്ക് ഇഷ്ടമുള്ള വിഷയത്തിലും മൂന്നും നാലും ക്ലാസുകള്‍ക്ക് പൂവന്‍കോഴികള്‍, വീട്ടുമുറ്റത്തെ കാഴ്ചകള്‍ എന്ന വിഷയത്തിലും ചിത്രരചന നടത്തി. രണ്ടായിരത്തില്‍പരം കുട്ടികള്‍ പങ്കെടുത്തു. മത്സരം ഇന്നും തുടരും.