അബൂദബി: ജനുവരി ആറിന് തുടങ്ങുന്ന ഏഷ്യാകപ്പിന് ഒരുങ്ങുന്നതിനായി ഇന്ത്യയും ഒമാനും തമ്മില്‍ സൗഹൃദ മത്സരം കളിക്കും. അടച്ചിട്ട സ്‌റ്റേഡിയത്തില്‍ ടൂര്‍ണമെന്റ് തുടങ്ങുന്നതിന്റെ തൊട്ടുമുന്‍പായിരിക്കും മത്സരം സംഘടിപ്പിക്കുക. ഏഷ്യാ കപ്പിനായി ഇന്ത്യ ഒരുക്കിയിട്ടുള്ള തന്ത്രങ്ങള്‍ പുറത്താകാതിരിക്കാനാണ് അടച്ചിട്ട സ്റ്റേഡിയത്തില്‍ മത്സരം സംഘടിപ്പിക്കുന്നതെന്ന് പരിശീലകന്‍ സ്റ്റീഫന്‍ കോണ്‍സ്റ്റന്റൈന്‍ പറഞ്ഞു. അബൂദബിയിലെ ബനിയാസ് സ്റ്റേഡിയത്തിലാണ് മത്സരം നടക്കുക. ലോകകപ്പ് യോഗ്യതാ മത്സരത്തില്‍ ഇന്ത്യയും ഒമാനും രണ്ട് തവണ മത്സരിച്ചപ്പോള്‍ രണ്ട് തവണയും ഒമാനൊപ്പമായിരുന്നു ജയം.
82-ാം സ്ഥാനത്തുള്ള ഒമാനും 97-ാം സ്ഥാനത്തുള്ള ഇന്ത്യയും തമ്മില്‍ മികച്ചൊരു മത്സരം തന്നെ നടക്കുമെന്നാണ് വിലയിരുത്തലുകള്‍. ഏഷ്യാ കപ്പിനായി ആദ്യമായി യു.എ.ഇയിലെത്തിയ ഇന്ത്യ പരിശീലനം തുടങ്ങിയിട്ടുണ്ട്. ഇവിടെ ലഭിക്കുന്ന മികച്ച സൗകര്യങ്ങള്‍ ഉപയോഗപ്പെടുത്തി നല്ല റിസല്‍ട്ടുണ്ടാക്കാന്‍ ശ്രമിക്കുമെന്ന് കോണ്‍സ്റ്റന്റൈന്‍ പറഞ്ഞു. നിലവിലെ അവസ്ഥയില്‍ ഇന്ത്യക്ക് മികച്ച പ്രതീക്ഷകളാണുള്ളത്. മറ്റുള്ള ഏഷ്യാ കപ്പുകളില്‍ ഇന്ത്യക്ക് ഇത് വ്യത്യസ്തമായ ഒന്നായിരിക്കുമെന്നും അദ്ദേഹം പറഞ്ഞു. കോണ്‍സ്റ്റന്റൈന് കീഴില്‍ ഇന്ത്യ 13 മത്സരങ്ങള്‍ തോല്‍വി അറിഞ്ഞിട്ടില്ല. ഇത് ഇന്ത്യയുടെ ആത്മവിശ്വാസം വര്‍ധിപ്പിക്കുന്നുണ്ട്. ഇക്കാരണത്താല്‍ യു.എ.ഇയില്‍ മികച്ച റിസല്‍ട്ടുണ്ടാക്കി പുതിയ ഫിഫ റങ്കിങ്ങില്‍ മികച്ച മുന്നേറ്റമുണ്ടാക്കും, കോണ്‍സ്റ്റന്റൈന്‍ പറഞ്ഞു.