പാരീസ്: ഫ്രഞ്ച് യുവതാരം കിലിയന്‍ എംബാപ്പെയെ ഫ്രഞ്ച് ഫുട്‌ബോളറായി തിരഞ്ഞെടുത്തു. അത്‌ലറ്റിക്കോ മാഡ്രിഡ് താരം അന്റോയിന്‍ ഗ്രിസ്മാന്‍ അടക്കമുള്ള താരങ്ങളെ പിന്നിലാക്കിയാണ് എംബാപ്പെ നേട്ടം സ്വന്തമാക്കിയത്.
വോട്ടിങില്‍ ടീമംഗങ്ങളായ അന്റോയിന്‍ ഗ്രീസ്മാന്‍, റാഫേല്‍ വരാനെ എന്നിവരെ പിന്തള്ളിയായിരുന്നു എംബാപ്പെയുടെ നേട്ടം.
ഈ വര്‍ഷം റഷ്യയില്‍ നടന്ന ലോകകപ്പില്‍ ഫ്രാന്‍സിനെ ചാംപ്യന്‍മാരാക്കുന്നതില്‍ നിര്‍ണായക പങ്കുവഹിച്ച താരമാണ് എംബാപ്പെ. ലോകകപ്പില്‍ മികച്ച യുവ താരത്തിനുള്ള പുരസ്‌കാരവും എംബാപ്പെയെ തേടിയെത്തിയിരുന്നു. പി.എസ്.ജിക്കു വേണ്ടണ്ടിയും താരം മിന്നുന്ന പ്രകടനം കാഴ്ചവച്ചിരുന്നു. ഫ്രഞ്ച് ലീഗ്, ഫ്രഞ്ച് കപ്പ്, ഫ്രഞ്ച് ലീഗ് കപ്പ് എന്നിവ പി.എസ്.ജിക്കു നേടിക്കൊടുക്കുന്നതില്‍ എംബാപ്പെ നിര്‍ണായക പങ്ക് വഹിച്ചു. വിവിധ ടൂര്‍ണമെന്റുകളിലായി ഈ വര്‍ഷം 34 ഗോളുകളും താരം നേടി.ഫ്രഞ്ച് മിഡ്ഫീല്‍ഡറായ എന്‍ഗോളോ കാന്റെയാണ് കഴിഞ്ഞ വര്‍ഷം പ്ലെയര്‍ ഓഫ് ദി ഇയറായി തിരഞ്ഞെടുക്കപ്പെട്ടത്. ചെല്‍സിക്കായി നടത്തിയ മികച്ച പ്രകടനമാണ് താരത്തിന് തുണയായത്. എന്നാല്‍ ഇത്തവണ ആദ്യ മൂന്നില്‍ പോലുമെത്താന്‍ കാന്റെയ്ക്കായില്ല.