മലമ്പുഴ: ജില്ലയില്‍ മഴ ദുര്‍ബലമായതിനാല്‍ മലമ്പുഴ അണക്കെട്ടിലേക്കുള്ള നീരൊഴുക്ക് കുറയുന്നു. ജൂണ്‍, ജൂലൈ മാസങ്ങളില്‍ കാലവര്‍ഷം ദുര്‍ബലമായതിനാല്‍ സംഭരണശേഷിയുടെ സമീപത്ത് പോലും വെള്ളമെത്തിയിട്ടില്ല. എന്നാല്‍ കഴിഞ്ഞ ഒരാഴ്ചയായി പെയ്ത മഴ നീരൊഴുക്കിന് ഗുണകരമായിരുന്നു.
ഒരാഴ്ചയ്ക്കിടെ മലമ്പുഴ അണക്കെട്ടിലേക്ക് ഒഴുകിയെത്തിയത് 3.0633 ദശലക്ഷം ഘനമീറ്റര്‍ വെള്ളമാണ്. ഈ മാസം രണ്ടിന് മലമ്പുഴയില്‍ ഉണ്ടായിരുന്നത് 52.56 ദശലക്ഷം ഘനമീറ്റര്‍ വെള്ളമായിരുന്നെങ്കില്‍ ഞായറാഴ്ചയുള്ളത് 55.6233 ദശലക്ഷം ഘനമീറ്റര്‍ വെള്ളമാണ്. എന്നാല്‍ കഴിഞ്ഞ വര്‍ഷം ഇതേ കാലയളവുമായി താരതമ്യപ്പെടുത്തുമ്പോള്‍ വെള്ളം വളരെ കുറവാണ്. 75.3315 ദശലക്ഷം ഘനമീറ്റര്‍ വെള്ളമാണ് 2016ല്‍ ഇതേദിവസം ഉണ്ടായിരുന്നത്.
കഴിഞ്ഞ വര്‍ഷം കൃഷിക്കും ഭാരതപ്പുഴയിലെ കുടിവെള്ള പദ്ധതികള്‍ക്കുമായി കൂടുതല്‍ വെള്ളം കൊടുക്കേണ്ടി വന്നതിനാല്‍ ജലനിരപ്പ് ഏറെ താഴെ എത്തിയിരുന്നു. ചളി അടിഞ്ഞിരിക്കുന്നതിനാല്‍ നിലവില്‍ പരമാവധി സംഭരണശേഷിയില്‍ വെള്ളം എത്താത്ത സ്ഥിതിയാണുള്ളത്. 2015ല്‍ നടത്തിയ പഠനപ്രകാരം മലമ്പുഴ അണക്കെട്ടില്‍ 28.26 ദശലക്ഷം ഘനമീറ്റര്‍ ചളിയടഞ്ഞിട്ടുണ്ട്.
12.50 ശതമാനം സംഭരണശേഷി കുറഞ്ഞു. 226 ദശലക്ഷം ഘനമീറ്റര്‍ പരമാവധി സംഭരണശേഷിയുള്ള അണക്കെട്ടിന് നിലവില്‍ 197.74 ദശലക്ഷം ഘനമീറ്റര്‍ ശേഷി മാത്രമാണുള്ളതെന്നാണ് കണക്ക്. 2011-12 ല്‍ മലമ്പുഴ അണക്കെട്ടില്‍ നിന്ന് മാത്രം 800 കോടിയോളം രൂപയുടെ മണല്‍ ഖനനം ചെയ്‌തെടുത്തിരുന്നു.