പാറശാല: പാറശാല റെയില്‍വേ സ്റ്റേഷനില്‍ ട്രെയിനില്‍ കടത്തിയ 600 ഗ്രാം കഞ്ചാവുമായി യുവാവ് പിടിയില്‍. നെടുമങ്ങാട് താലൂക്കില്‍ തേക്കട വില്ലേജില്‍ കന്യാകുളങ്ങര കൊഞ്ചിറവിള സി.എസ്.ഐ ചര്‍ച്ചിനു സമീപം മൂലയില്‍ വീട്ടില്‍ സഫീര്‍ (30) ആണ് പിടിയിലായത്.
ഇന്നലെ രാവിലെ 7.40 ന് പാറശാല റെയില്‍വേ സ്റ്റേഷനില്‍ എത്തിയ നാഗര്‍കോവില്‍-തിരുവനന്തപുരം പാസഞ്ചര്‍ ട്രെയിനില്‍ പൊലിസ് പരിശോധന നടത്തുന്നതിനിടെ ഒരു യുവാവ് ട്രെയിനില്‍ നിന്ന് പുറത്തേയ്ക്ക് ഇറങ്ങി ഓടുകയായിരുന്നു. ഇയാളെ പിന്തുടര്‍ന്ന് പിടികൂടിയ പൊലിസ് നടത്തിയ പരിശോധനയില്‍ പ്രതിയുടെ കൈവശമുണ്ടായിരുന്ന സഞ്ചിയില്‍ ടി-ഷര്‍ട്ടില്‍ പൊതിഞ്ഞ കാരി ബാഗിനുള്ളില്‍ കഞ്ചാവ് കണ്ടെത്തുകയായിരുന്നു.
പ്രതിയെ ചോദ്യം ചെയ്തപ്പോള്‍ പളനിയിലുള്ള ഒരു ഒട്ടോ ഡ്രൈവറില്‍ നിന്നും 3000 രൂപയ്ക്ക് വാങ്ങിയതാണെന്നും നാട്ടില്‍ ചില്ലറ വില്‍പ്പനയ്ക്കായി കൊണ്ട് പോകുന്നതാണെന്നും പ്രതി മറുപടി നല്‍കി. പാറശാല റെയില്‍വേ എസ്.ഐ.അനില്‍കുമാറിന്റെ നേതൃത്വത്തില്‍ എ.എസ്.ഐ ഷിബുകുമാര്‍ , ടി.വി.സി സ്‌കോഡ് സി.പി.ഒ അനില്‍കുമാര്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്.