ന്യൂഡല്‍ഹി: സഖ്യമെന്നാല്‍ ഒത്തുതീര്‍പ്പുകളും വിട്ടു വീഴ്ചകളുമാണെന്ന് ബി.ജെ.പി ജനറല്‍ സെക്രട്ടറി റാം മാധവ്. സഖ്യത്തില്‍ പാര്‍ട്ടികള്‍ വരികയും പോവുകയും ചെയ്യുമെന്നും അദ്ദേഹം വ്യക്തമാക്കി. ഘടകകക്ഷികള്‍ എന്‍.ഡി.എ വിടുന്നതിനിടെയാണ് 'പ്ലാന്‍ ബി'യുമായി ബി.ജെ.പി രംഗത്തെത്തിയിരിക്കുന്നത്. ചില പാര്‍ട്ടികള്‍ വിട്ടു പോയിട്ടുണ്ട് എന്നത് വാസ്തവമാണെന്നും എന്നാല്‍ മറ്റു ചില പാര്‍ട്ടികള്‍ എന്‍.ഡി.എയിലെത്തുമെന്നും റാം മാധവ് കൂട്ടിച്ചേര്‍ത്തു.

സഖ്യകക്ഷി രാഷ്ട്രീയത്തില്‍ നീക്കുപോക്കും ഒത്തുതീപ്പും വേണ്ടിവരും. ആര്‍.എല്‍.എസ്.പി പോലുള്ള കക്ഷികള്‍ ബിഹാറില്‍ എന്‍.ഡി.എ വിട്ടുപോയി എന്നത് വാസ്തവമാണ്. എന്നാല്‍ പുതിയ ചില സഖ്യകക്ഷികള്‍ കിഴക്കന്‍ സംസ്ഥാനങ്ങളിലും ദക്ഷിണേന്ത്യയിലും എന്‍.ഡി.എക്കൊപ്പം കൂടിയിട്ടുണ്ടെന്നും അദ്ദേഹം പറഞ്ഞു.

തെരഞ്ഞെടുപ്പിന് മുമ്പ് കൊഴിഞ്ഞുപോക്കുകള്‍ പതിവാണ്. അത് പുതിയ കാര്യമല്ലെന്നും റാം മാധവ് പറഞ്ഞു.

ചന്ദ്രബാബു നായിഡുവിന്റെ ടി.ഡി.പിയും ജമ്മു കശ്മീരില്‍ പി.ഡി.പിയും ബിഹാറില്‍ ആര്‍.എല്‍.എസ്.പിയും എന്‍.ഡി.എ വിട്ടിരുന്നു.