ജിദ്ദ: കേരളാ ഹജ്ജ് കമ്മറ്റിയുടെ നേതൃത്വത്തിലുള്ള തീര്‍ഥാടകര്‍ മക്കയിലെത്തി. രാവിലെ പതിനൊന്നു മണിയോടെയാണ് തീര്‍ഥാടകര്‍ ജിദ്ദ കിംഗ് അബ്ദുല്‍ അസീസ് വിമാനത്താവത്തില്‍ ഹജ്ജ് ടെര്‍മിനലില്‍ എത്തിയത്. ആദ്യസംഘത്തില്‍ 300 പേരുണ്ടായിരുന്നു. ഇവരെ ജിദ്ദ ഇന്ത്യന്‍ കോണ്‍സിലര്‍ ജനറല്‍ മുഹമ്മദ് നൂര്‍ റഹ്മാന്‍ ശൈഖിന്റെ നേതൃത്തത്തില്‍ മലയാളി ഹജ്ജ് വളണ്ടിയര്‍ സംഘവും ചേര്‍ന്ന് മധുരം നല്‍കി ഇവരെ സ്വീകരിച്ചു.

മൂന്ന് വിമാനങ്ങളിലായി 900പേരാണ് ജിദ്ദയില്‍ ഇറങ്ങിയത്. ഉച്ചനമസ്‌കാരത്തിനു ശേഷം ബസ്സുകളിലായി ഇവരെ മക്കയില്‍ എത്തിച്ചു. അസീസിയയിലാണ് ഇവര്‍ക്ക് താമസം. താമസസ്ഥലത്തെത്തിയ ഇവര്‍ രാത്രിയോടെ മസ്ജിദുല്‍ ഹറമിലെത്തി ഉംറ നിര്‍വഹിച്ചു. ഹറമില്‍ നിന്ന് 10 കിലോമീറ്റര്‍ അകലെ അസീസിയ്യയിലെ ബിന്‍ഹുമൈദില്‍ ബ്രാഞ്ച് അഞ്ചില്‍ 267,270,286,329 നമ്പര്‍ കെട്ടിടങ്ങളിലാണ് ആദ്യസംഘത്തിലെത്തിയ ഹാജിമാര്‍ക്ക് താമസം. ഇവിടെ നിന്ന് 24 മണിക്കൂറും ബസ് മാര്‍ഗം ഹറമില്‍ പോകാന്‍ സൗകര്യം ഉണ്ടായിരിക്കും. അഞ്ച് പേര്‍ക്ക് താമസിക്കാന്‍ സൗകര്യമുള്ള ബാത് അറ്റാച്ച്ഡ് റൂമുകളാണ് ഒരുക്കിയത്. റൂമില്‍ ഭക്ഷണം പാകം ചെയ്യാന്‍ ഗ്യാസ് അടുപ്പും ഒരുക്കിയിട്ടുണ്ട്.

സംസം വെള്ളം 'മുത്തവിഫുമാര്‍' എല്ലാ ദിവസവും റൂമുകളില്‍ എത്തിക്കും. 200 ഹാജിമാര്‍ക്ക് ഒരു വളണ്ടിയര്‍ എന്ന തോതില്‍ ഹജ്ജ് മിഷന്‍ വളണ്ടിയര്‍മാരുണ്ടാവും. കേരളത്തില്‍ നിന്നുള്ള തീര്‍ഥാടകരുടെ അവസാന വിമാനം 26നാണ്. ജിദ്ദയില്‍ ഇറങ്ങിയ തീര്‍ഥാടകരുടെ തിരിച്ചുപോക്ക് മദീന വഴിയാവും.