ധരംശാല: വായ്പ തള്ളുന്ന കാര്യത്തില്‍ കോണ്‍ഗ്രസ് കര്‍ഷകരെ തെറ്റിദ്ധരിപ്പിക്കുകയാണെന്ന് പ്രധാനമന്ത്രി നരേന്ദ്ര മോദി. മൂന്നു സംസ്ഥാനങ്ങളില്‍ വായ്പ എഴുതിത്തള്ളിയതിനു പിന്നാലെ മോദിക്കെതിരെ കോണ്‍ഗ്രസ് ആക്രമണം ശക്തമാക്കിയിരുന്നു. കാര്‍ഷിക വായ്പകള്‍ എഴുതി തളളാതെ മോദിയെ ഉറങ്ങാന്‍ സമ്മതിക്കില്ലെന്ന് കഴിഞ്ഞ ദിവസം രാഹുല്‍ ഗാന്ധി പറഞ്ഞിരുന്നു

2009 ല്‍ അധികാരത്തിലേറിയ കോണ്‍ഗ്രസ് സര്‍ക്കാര്‍ ആറു ലക്ഷം കോടി രൂപയുടെ കടം എഴുതിത്തള്ളുമെന്ന് പ്രഖ്യാപിച്ച് വെറും 60,000 കോടി രൂപയുടെ വായ്പ മാത്രമാണ് തള്ളിയെന്ന് മോദി ആരോപിച്ചു.

ഹിമാചല്‍പ്രദേശിലെ ധരംശാലയില്‍ ജന്‍ അഭര്‍ റാലിയില്‍ സംസാരിക്കുകയായിരുന്നു മോദി. വണ്‍ റാങ്ക് വണ്‍ പെന്‍ഷന്റെ കാര്യത്തില്‍ അന്നത്തെ കോണ്‍ഗ്രസ് സര്‍ക്കാര്‍ സൈനികരെ വിഡ്ഢികളാക്കിയെന്നും അദ്ദേഹം ആരോപിച്ചു.

വണ്‍ റാങ്ക്‌വണ്‍ പെന്‍ഷന് വേണ്ടി കഴിഞ്ഞ 40 വര്‍ഷമായി നമ്മുടെ സൈനികര്‍ ആവശ്യപ്പെടുകയാണ്. സൈനികരെ വിഡ്ഢികളാക്കിയ അന്നത്തെ സര്‍ക്കാര്‍ വെറും 500 കോടി രൂപ മാത്രമാണ് നീക്കി വെച്ചത്. ഞങ്ങള്‍ ഭരണത്തിലെത്തി ഞാന്‍ ഫയലിന് ചോദിച്ചപ്പോള്‍ ഉദ്യോഗസ്ഥന്മാര്‍ ശരിക്കും ഞെട്ടിപ്പോയി- മോദി പറഞ്ഞു.

1200 കോടി രൂപ ആ സ്‌കീമിന് വേണ്ടി വരുമെന്ന് ഞങ്ങള്‍ തിരിച്ചറിഞ്ഞു. ഒറ്റ തവണയായി ഇത്രയും തുക ഞങ്ങള്‍ക്ക് നല്‍കാന്‍ കഴിയുമായിരുന്നില്ല, അതുകൊണ്ട് ഞാന്‍ സൈനികരെ വിളിച്ച് കാര്യം പറഞ്ഞു. അങ്ങനെ നാലോ അഞ്ചോ തവണകളായി പണം ലഭ്യമാക്കാന്‍ അവരും സമ്മതിച്ചു- മോദി പറഞ്ഞു.

പണം കൊളളയടിക്കുന്ന ശീലമുളളവര്‍ക്ക് ഇപ്പോള്‍ രാജ്യത്തിന്റെ ചൗക്കിദാറിനെ (കാവല്‍ക്കാരന്‍) പേടിയാണെന്നും അദ്ദേഹം പറഞ്ഞു. അത്‌കൊണ്ട് ഇപ്പോള്‍ ചീത്ത വിളിക്കുകയാണ്. ഈ കാവല്‍ക്കാരന്‍ കളളന്മാരെ വെറുതെ വിടില്ലെന്നും മോദി പറഞ്ഞു.