കൊല്ലം: ചികില്‍സ കിട്ടാതെ ആംബുലന്‍സില്‍ മരിച്ച തമിഴ്‌നാട് സ്വദേശി മുരുകന്റെ ബന്ധുക്കള്‍ സഹായംതേടി 16ന് മുഖ്യമന്ത്രിയെ കാണും.
മുരുകന്റെ ഭാര്യ മുരുകമ്മാളും മക്കളായ ഗോകുലും രാഹുലും ഇന്നലെ വൈകിട്ട് സി.പി.എം കൊല്ലം ജില്ലാ കമ്മിറ്റി ഓഫിസിലെത്തി സെക്രട്ടറി കെ.എന്‍ ബാലഗോപാലിനെ കണ്ടിരുന്നു. ഡി.വൈ.എഫ്.ഐയുടെ ആംബുലന്‍സിലായിരുന്നു മൃതദേഹം തമിഴ്‌നാട്ടിലെത്തിച്ചിരുന്നത്. 20,000 രൂപയും സംഘടന നല്‍കിയിരുന്നു.
ന്യൂറോ സര്‍ജനില്ലെന്ന കാരണത്താലാണ് ആദ്യം വിദഗ്ധ ചികിത്സയ്ക്കായെത്തിച്ച മെഡിട്രീന ആശുപത്രിയില്‍ മുരുകന് ചികിത്സ നിഷേധിച്ചത്. അസീസിയ മെഡിക്കല്‍ കോളജിലും ഇതേ കാരണത്താലാണ് ചികിത്സിക്കാതിരുന്നത്. എമര്‍ജന്‍സി, ട്രോമാ കെയര്‍ എന്നിവയുള്ള ആശുപത്രികളുടെ വീഴ്ചയാണിതെന്നാണ് ആരോഗ്യവകുപ്പ് പറയുന്നത്. ന്യൂറോ, ഓര്‍ത്തോപീഡിക് ജനറല്‍ സര്‍ജന്‍മാരും അനസ്‌തേഷ്യ ഡോക്ടറും 24 മണിക്കൂറും വേണമെന്നാണ് അത്യാഹിത വിഭാഗത്തിന്റെ ചട്ടം.
കൊല്ലം നഗരത്തിലും കൊട്ടാരക്കര, കരുനാഗപ്പള്ളി താലൂക്ക് ആശുപത്രികളിലും ട്രോമാ കെയര്‍ സ്ഥാപിക്കാന്‍ അഞ്ചുവര്‍ഷം മുന്‍പ് ആരോഗ്യവകുപ്പ് തീരുമാനിച്ചിരുന്നെങ്കിലും ഇതുവരെയും പ്രാരംഭ നടപടികളെടുത്തിട്ടില്ല.