പാണ്ടിക്കാട്: അല്‍ഫാറൂഖ് ഇംഗ്ലീഷ് മീഡിയം സ്‌കൂളില്‍ രണ്ടുതരം യൂനിഫോം ഉപയോഗിക്കുന്നുവെന്ന രീതിയില്‍ ചില മാധ്യമങ്ങളില്‍ വന്നിട്ടുള്ള വാര്‍ത്തകള്‍ വാസ്തവവിരുദ്ധമെന്ന് സ്‌കൂള്‍ മാനേജിങ് കമ്മിറ്റി ഭാരവാഹികള്‍ വാര്‍ത്താക്കുറിപ്പില്‍ വ്യക്തമാക്കി.
കാര്യങ്ങളുടെ നിജസ്ഥിതി മനസ്സിലാക്കാതെയും മാനേജ്‌മെന്റിന്റെ ഭാഗം കേള്‍ക്കാതെയും ഏകപക്ഷീയമായാണ് വാര്‍ത്ത നല്‍കിയത്. 20 വര്‍ഷമായി പ്രവര്‍ത്തിക്കുന്ന സ്ഥാപനം വിദ്യാര്‍ഥികളോടോ ജീവനക്കാരോടോ ഒരുതരത്തിലുമുള്ള വിവേചനവും കാണിച്ചിട്ടില്ല. സ്‌കൂളില്‍ കലാ, കായിക, സാഹിത്യ മത്സരങ്ങള്‍ സംഘടിപ്പിക്കുന്നതിനായി കുട്ടികളെ പല ഗ്രൂപ്പുകളായി തിരിക്കാറുണ്ട്.
ഗ്രൂപ്പ് ക്യാപ്റ്റന്മാരും മിടുക്കരായ കുട്ടികളും ആ ദിവസങ്ങളില്‍ ചില പ്രത്യേക വേഷങ്ങള്‍ ധരിക്കാറുണ്ട്. ഗ്രൂപ്പ് ക്യാപ്റ്റന്മാരായ കുട്ടികള്‍ ധരിച്ചിരുന്ന പ്രത്യേക വെള്ള ഷര്‍ട്ട് ചൂണ്ടിക്കാട്ടിയാണ് സ്‌കൂളില്‍ രണ്ടുതരം യൂനിഫോം ഉണ്ടെന്ന വാര്‍ത്ത നല്‍കിയിരിക്കുന്നത്.
ഇതിനെതിരേ നിയമനടപടി സ്വീകരിക്കുമെന്ന് പ്രസിഡന്റ് സയ്യിദ് അബ്ദുറഹ്മാന്‍ ഉണ്ണിക്കോയ തങ്ങള്‍, സെക്രട്ടറി ഒ.ടി മൂസ മുസ്‌ലിയാര്‍, ട്രഷറര്‍ കളത്തില്‍ അലവി ഹാജി, പി.എ അസീസ് മാസ്റ്റര്‍, കളത്തില്‍ ഉസ്മാന്‍ ഹാജി, മുസ്തഫ പൂക്കോയ തങ്ങള്‍, സയ്യിദ് ഫക്രുദ്ദീന്‍ തങ്ങള്‍, മാനു മാസ്റ്റര്‍, അഡ്വ.അബു സിദ്ദീഖ് തുടങ്ങിയവര്‍ പറഞ്ഞു.