മനാമ: ബഹ്‌റൈന്‍ അന്താരാഷ്ട്ര വിമാനത്താവളത്തിലെ സര്‍വിസുകള്‍ സാധാരണ നിലയിലായി. അമേരിക്കയുടെ എഫ്-18 യുദ്ധവിമാനം കഴിഞ്ഞ ദിവസം ഇവിടെ ഇടിച്ചിറക്കിയിരുന്നു.
തുടര്‍ന്നാണ് സര്‍വിസുകള്‍ താറുമാറായത്. വിവിധ സര്‍വിസുകള്‍ വഴിതിരിച്ചുവിട്ടു. കൊച്ചിയില്‍ നിന്ന് കോഴിക്കോട് വഴി മനാമയിലേക്ക് വന്ന എയര്‍ ഇന്ത്യാ എക്‌സ്പ്രസ് സഊദിയിലെ ദമാമില്‍ ഇറക്കി.
വിമാന വാഹിനി കപ്പലില്‍ നിന്ന് പറന്നുപൊങ്ങിയ എഫ്-18 വിമാനത്തിന്റെ എന്‍ജിന്‍ തകരാറാണ് അടിയന്തര ലാന്റിങ്ങിലേക്ക് നയിച്ചതെന്ന് യു.എസ് നേവി വക്താവ് അബന്‍ പറഞ്ഞു.
ആദ്യം ശൈഖ് ഈസ എയര്‍ ബേസില്‍ ഇറക്കാനാണ് പൈലറ്റ് ശ്രമിച്ചത്. ഇതു പരാജയപ്പെട്ടതിനെ തുടര്‍ന്നാണ് മനാമ വിമാനത്താവളത്തില്‍ ഇറക്കിയത്.
പൈലറ്റ് സുരക്ഷിതനാണെന്ന് യു.എസ് അധികൃതര്‍ പറഞ്ഞു. അതേസമയം, സംഭവത്തെകുറിച്ച് ബഹ്‌റൈന്‍ വിമാനത്താവള അധികൃതര്‍ അന്വേഷണം തുടങ്ങി.