അസ്താന: ഏഴാമത് ഏഷ്യന്‍ ഷോട്ഗണ്‍ ചാംപ്യന്‍ഷിപ്പിലെ പോരാട്ടങ്ങള്‍ക്ക് ഇന്ത്യ സുവര്‍ണ നേട്ടത്തോടെ വിരാമമിട്ടു. സ്‌കീറ്റ് മിക്‌സഡ് ടീമിനത്തില്‍ ഇന്ത്യയുടെ മെയ്‌രാജ് അഹമദ് ഖാന്‍- രശ്മി റാത്തോഡ് സഖ്യം സ്വര്‍ണം സ്വന്തമാക്കി ഇന്ത്യയുടെ അഭിമാനം കാത്തു. ചൈനീസ് സഖ്യമായ ജിയാങ്ചി ലിയു- ജിയാന്‍മെയ് ഗാവോ ടീമിനെയാണ് ഇന്ത്യന്‍ സഖ്യം ഫൈനലില്‍ പരാജയപ്പെടുത്തിയത്. 28-27 എന്ന സ്‌കോറിനാണ് മെയ്‌രാജ്- രശ്മി സഖ്യം വിജയവും സ്വര്‍ണവും സ്വന്തമാക്കിയത്. കസാഖിസ്ഥാന്‍ സഖ്യമായ വ്‌ളാദിസ്ലേവ് മുഖമെദ്യെവ്- ഒള്‍ഗ പനരിന ടീമിനാണ് വെങ്കലം.
ടൂര്‍ണമെന്റില്‍ എട്ട് മെഡലുകളാണ് ഇന്ത്യയുടെ സമ്പാദ്യം. ഇതില്‍ മൂന്ന് സ്വര്‍ണവുമുള്‍പ്പെടും. നേരത്തെ അങ്കുര്‍ മിത്തല്‍ പുരുഷ ഡബിള്‍ ട്രാപ് വിഭാഗം വ്യക്തിഗതയിനത്തിലും ടീമിനത്തിലും സ്വര്‍ണം സമ്മാനിച്ചിരുന്നു. ഒരു വെള്ളിയും നാല് വെങ്കലവുമടക്കമാണ് എട്ട് മെഡലുകള്‍ ഇന്ത്യ നേടിയത്.