കൊടുങ്ങല്ലൂര്‍: ലക്കിക്ക് ക്രിസ്മസ് നാളില്‍ കുഞ്ഞ് പിറന്നു. നാലു വയസുകാരി ലക്കിയെന്ന കുതിരയ്ക്കാണ് ആണ്‍കുഞ്ഞു പിറന്നിരിക്കുന്നത്.
എറിയാട് ഏറ്റത്ത് അഖിലിന്റെ ഉടമസ്ഥതയിലുള്ളതാണ് കാട്ട്പാടി മാര്‍വാരി സങ്കരയിനം കുതിര. പറവൂരില്‍ കൂട്ടുകാരോടൊത്ത് കുതിര സവാരി ക്ലബ് നടത്തുന്ന അഖില്‍ നല്ല ഇണക്കവും അനുസരണയുമുള്ള ലക്കിയെ വീട്ടിലേക്ക് കൊണ്ടുവരികയായിരുന്നു. ഒന്നര വര്‍ഷം മുന്‍പാണ് ലക്കി തമിഴ്‌നാട്ടില്‍ നിന്നും ഇവിടെ എത്തിയത്. 15 കുതിരകളുള്ള സവാരി ക്ലബില്‍ നിന്നും ഇണ ചേര്‍ന്ന ലക്കി 370 ദിവസത്തെ ഗര്‍ഭകാലത്തിന് ശേഷം ക്രിസ്മസ് ദിനത്തില്‍ രാവിലെയാണ് ഒരു കുഞ്ഞിന് ജന്മം നല്‍കിയത്. ഒരു ദിവസം പ്രായമുള്ള പ്രിന്‍സ് എന്ന കുതിരക്കുട്ടി പുരയിടത്തില്‍ ഓടി നടപ്പാണ്. അമ്മയെയും കുഞ്ഞിനെയും കാണാന്‍ ഒട്ടനവധി പേര്‍ വന്നെത്തുന്നുണ്ട്.
അതിഥികളില്‍ നിന്നും പ്രിന്‍സിനെ കരുതലോടെ ചേര്‍ത്തു പിടിച്ചുനില്‍പ്പാണ് ലക്കി.