കൊടുങ്ങല്ലൂര്‍: ചുരുങ്ങിയ കാലം കൊണ്ട് ജനങ്ങളുമായി സംവദിക്കാനുള്ള വേദിയായി മാറിയ കേരള പൊലിസ് ഫേസ്ബുക്ക് പുതിയ റെക്കോര്‍ഡിനരികെ.
അന്താരാഷ്ട്ര തലത്തില്‍ ഫേസ്ബുക്ക് പേജുകളില്‍ ന്യൂയോര്‍ക്ക് പൊലിസിനെയും ക്യൂന്‍സ്ലാന്‍ഡ് പൊലിസിനെയുമെല്ലാം പിന്തള്ളിയ കേരള പൊലിസിനു മുന്നിലിനി നേപ്പാള്‍ പൊലിസ് മാത്രമാണുള്ളത്. നിലവില്‍ കേരള പൊലിസിന്റെ ഔദ്യോഗിക പേജിന് 9,41689 ലൈക്കാണുള്ളത്. തൊട്ടു മുന്നിലുള്ള നേപ്പാള്‍ പൊലിസിന്റെ പേജിന് 13,46217 ലൈക്കുകളുണ്ട്. ന്യൂയോര്‍ക്ക് പൊലിസ് 7,89,002, ബാംഗ്ലൂര്‍ പൊലിസ് 6,31638 എന്നിവയാണ് മുന്‍നിരയിലുള്ള മറ്റു ഫേസ് ബുക്ക് പേജുകള്‍.
തമിഴ്‌നാട്, മഹാരാഷ്ട്ര തുടങ്ങിയ സംസ്ഥാനങ്ങളിലെ പൊലിസ് പേജുകള്‍ ബഹുദൂരം പിറകിലാണ്. കുറ്റകൃത്യങ്ങള്‍ക്കും സാമൂഹ്യ വിരുദ്ധ പ്രവര്‍ത്തനങ്ങള്‍ക്കുമെതിരേയുള്ള ബോധവല്‍ക്കരണവും, മുന്നറിയിപ്പുകളുമായി കേരള പൊലിസിന്റെ സാമൂഹ്യ മാധ്യമ വിഭാഗം ജനപ്രിയമായി മാറിയിരിക്കുകയാണ്.