തിരുവനന്തപുരം: വനിതാ മതിലില്‍ ബി.ഡി.ജെ.എസും തുഷാര്‍ വെള്ളാപ്പള്ളിയും പങ്കെടുത്താല്‍ പ്രശ്‌നമില്ലെന്ന് ബി.ജെ.പി സംസ്ഥാന അധ്യക്ഷന്‍ പി.എസ്. ശ്രീധരന്‍പിള്ള. ബി.ഡി.ജെ.എസ,്് എന്‍.ഡി.എ മുന്നണിയുടെ ഭാഗമാണെങ്കിലും വനിതാ മതിലില്‍ പങ്കെടുക്കുന്ന കാര്യത്തില്‍ അവര്‍ക്ക് സ്വതന്ത്ര തീരുമാനമെടുക്കാം. ശബരിമലയുമായി ബന്ധപ്പെട്ടതല്ല വനിതാ മതിലെന്ന് സംഘാടകര്‍ വ്യക്തമാക്കിയിട്ടുണ്ട്.
അയ്യപ്പ ജ്യോതി സംഘടിപ്പിച്ചത് ശബരിമല കര്‍മ സമിതിയാണ്. അതിനാല്‍ ബി.ഡി.ജെ.എസ് പങ്കെടുക്കാത്തതില്‍ പ്രശ്‌നമില്ല. എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ പറഞ്ഞതിന് മറുപടി പറയാനും അദ്ദേഹത്തെക്കുറിച്ച് മോശമായി പറയാനും ആഗ്രഹിക്കുന്നില്ലെന്നും ശ്രീധരന്‍പിള്ള പറഞ്ഞു. തിരുവനന്തപുരത്ത് മാധ്യമ പ്രവര്‍ത്തകരുടെ ചോദ്യത്തിന് മറുപടി നല്‍കുകയായിരുന്നു അദ്ദേഹം.