കൊച്ചി: വേള്‍ഡ് മലയാളി ഫെഡറേഷന്‍ കേരള ഘടകം 'നാം ഒരുമിച്ച് കേരളത്തിനൊപ്പം' എന്ന ആശയമുയര്‍ത്തി നാളെ എറണാകുളം ടൗണ്‍ഹാളില്‍ കേരള മീറ്റ് സംഘടിപ്പിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.

വൈകിട്ട് അഞ്ചിന് നടക്കുന്ന സാംസ്‌കാരിക സമ്മേളനം സ്പീക്കര്‍ ശ്രീരാമകൃഷ്ണന്‍ ഉദ്ഘാടനം ചെയ്യും. പ്രതിപക്ഷനേതാവ് രമേശ് ചെന്നിത്തല മുഖ്യാതിഥിയാവും. സുവനീര്‍ പ്രകാശനം സംവിധായകന്‍ മധുപാല്‍ നിര്‍വഹിക്കും.

പ്രളയവേളയില്‍ രക്ഷാപ്രവര്‍ത്തനത്തിലും ദുരിതാശ്വാസപ്രവര്‍ത്തനങ്ങളിലും മികച്ച പ്രകടനം കാഴ്ചവച്ച എ.സി.പി കെ. ലാല്‍ജി, ക്യാപ്റ്റന്‍ സന്ദീപ് മാലിക്, ജോണ്‍ മാത്യു, എ.എസ് ജോഗി, പൂര്‍ണിമ ഇന്ദ്രജിത്ത് എന്നിവര്‍ക്ക് പുരസ്‌കാരങ്ങള്‍ നല്‍കും. വേള്‍ഡ് മലയാളി ഫെഡറേഷന്‍ കേരള ഘടകം പ്രളയബാധിതര്‍ക്ക് നിര്‍മിച്ചുനല്‍കുന്ന വീടിന്റെ താക്കോല്‍ദാനവും ചടങ്ങില്‍ നടക്കും. പ്രിന്‍സ് പള്ളിക്കുന്നേല്‍, ആനി ലിബു, വി.എം സിദ്ദീഖ്, റഫീഖ് മരക്കാര്‍, സി. ചാണ്ടി എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.