സുല്‍ത്താന്‍ ബത്തേരി: ഒന്നാംമൈലില്‍ കാട്ടാനകൂട്ടം വിളകള്‍ നശിപ്പിച്ചു. സുല്‍ത്താന്‍ ബത്തേരി-പുല്‍പ്പള്ളി റോഡില്‍ ഒന്നാംമൈലിലാണ് ജനവാസകേന്ദ്രത്തില്‍ കാട്ടാനകൂട്ടം ഇറങ്ങി വിളകള്‍ നശിപ്പിച്ചത്. പ്രദേശവാസിയായ ഒറ്റമാളിയേക്കല്‍ പൂക്കോയതങ്ങളുടെ കൃഷിയിടത്തിലിറങ്ങിയ ആനകൂട്ടം തെങ്ങ്, വാഴ, കാപ്പി തുടങ്ങിയ വിളകളാണ് നശിപ്പിച്ചത്. കാട്ടാനകള്‍ കൃഷിയിടത്തിലിറങ്ങുന്നത് തടയുന്നതിന്നായി വനാതിര്‍ത്തിയില്‍ നിര്‍മിച്ച കിടങ്ങും മറികടന്ന് റോഡും മുറിച്ചുകടന്നാണ് കാട്ടാനകൂട്ടം കൃഷിയിടത്തിലെത്തിയത്. പൂക്കോയതങ്ങളുടെ വീടിനോട് തൊട്ടുചേര്‍ന്ന് കാട്ടാനകൂട്ടം ഏറെനേരം നിലയുറപ്പിച്ചത് വീട്ടുകാരെ ഭയപ്പാടിലാക്കി.
കാടിന് മറുഭാഗത്താണ് വീടുകളുണ്ടങ്കിലും ഈഭാഗത്ത് കാട്ടാനശല്യം കുറവാണ്. കാട്ടാനകൂട്ടം ഈ ഭാഗത്ത് ഇറങ്ങിയതോടെ പ്രദേശവാസികളും ഭയപ്പാടിലായിരിക്കുകയാണ്. സംഭവത്തെതുടര്‍ന്ന് വനപാലകര്‍ സ്ഥലത്തെത്തി നാശനഷ്ടങ്ങള്‍ വിലയിരുത്തി.
ഇടിഞ്ഞുതൂര്‍ന്ന ആനകിടങ്ങ് മണ്ണിമാറ്റി പൂര്‍വസ്ഥിതിയിലാക്കാനുള്ള നടപടികള്‍ സ്വീകരിക്കാനുള്ള ഒരുക്കത്തിലാണ് വനംവകുപ്പ്.