നിലമ്പൂര്‍: കുളിക്കാനിറങ്ങിയ യുവാവിനെ ചാലിയാര്‍ പുഴയില്‍ ഒഴുക്കില്‍പ്പെട്ട് കാണാതായി. മഞ്ചേരി പുല്‍പ്പറ്റ കാരാപറമ്പ് ആര്‍ക്കാട്ടില്‍ അസീസിന്റെ മകന്‍ ജംഷീദിനെ (29) യാണ് ഇന്നലെ വൈകീട്ട് മൂന്നരയോടെ മൈലാടി പാലത്തിനു ചുവട്ടില്‍ ഒഴുക്കില്‍പ്പെട്ട് കാണാതായത്. ബന്ധുവായ ആസിഫിനോടൊപ്പം ആഢ്യന്‍പാറ വെള്ളച്ചാട്ടം കാണാനെത്തി മടങ്ങുന്ന വഴി കുളിക്കാനായാണ് ഇരുവരും മൈലാടി പാലത്തിന് ചുവട്ടില്‍ ചാലിയാറില്‍ ഇറങ്ങിയത്. പാറയില്‍ കാല്‍ വഴുതി ഒഴുക്കില്‍പെടുകയായിരുന്നു.
ആസിഫിന്റെ നിലവിളി കേട്ട് നാട്ടകാരും ഓടികൂടി. നിലമ്പൂരില്‍ നിന്നുള്ള ഫയര്‍ഫോഴ്‌സ്, എമര്‍ജന്‍സിഫോഴ്‌സ്, ട്രോമാകെയര്‍ വളണ്ടിയര്‍മാരും പൊലിസും, നാട്ടുകാരും ചേര്‍ന്ന് തിരച്ചില്‍ നടത്തിയെങ്കിലും കണ്ടെത്താനായില്ല. രാത്രി എട്ടുമണിയോടെ തിരച്ചില്‍ നിര്‍ത്തി. ഇയ്യിടെയാണ് ജംഷീദിന്റെ വിവാഹം കഴിഞ്ഞത്. മൂന്നുവര്‍ഷമായി സൗദിയില്‍ ജോലി ചെയ്തുവരികയായിരുന്ന ജംഷീദ് വിവാഹത്തിനുവേണ്ടി അവധിയിലാണ് നാട്ടിലെത്തിയത്. തിരച്ചില്‍ ഇന്ന് പുനരാംഭിക്കും.