മണ്ണാര്‍ക്കാട് : വിദേശ മദ്യവുമായി രണ്ട് യുവാക്കള്‍ അറസ്റ്റില്‍. നഗരത്തില്‍ നിന്നും കൊള്ളലാഭത്തില്‍ അട്ടപ്പാടി മേഖലയില്‍ ന്യൂ ഇയര്‍ ലക്ഷ്യം വച്ച് വില്‍പനക്കായി കാറില്‍ കൊണ്ടുവന്ന 27 ലിറ്റര്‍ ഇന്ത്യന്‍ നിര്‍മിത വിദേശമദ്യംആണ് അഗളി അഡിഷണല്‍ എസ്. ഐ രതീഷ് ,എ.എസ്.പി സ്‌ക്വാഡും സിവില്‍ പൊലീസ് ഒഫീസര്‍ അനില്‍ എന്നിവര്‍ ചേര്‍ന്ന് പിടികൂടിയത്.
അഗളി എ. എസ്. പി നവനീത് ശര്‍മ ഐ. പി. എസ് ന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ മുക്കാലി പ്രാഥമിക ആരോഗ്യ കേന്ദ്രത്തിന് സമീപത്ത് വെച്ചാണ് ഇവരെ പിടികൂടിയത്. 47 പ്ലാസ്റ്റിക് കുപ്പികളിലായി കാറിന്റെ വിവിധ ഭാഗങ്ങളിലും രഹസ്യ അറയിലും ഒളിപ്പിച്ചു വെച്ച രീതിയിലായിരുന്നു മദ്യം.
സംഭവവുമായി ബന്ധപെട്ടു വിയ്യക്കുറുശ്ശി പറയകത്തു വീട്ടില്‍ അശ്വിന്‍ ദാസ് (22), കാരാകുറുശ്ശി കോലാനി നേന്ത്രപ്പുഴ വീട്ടില്‍ രതീഷ് (19) എന്നിവരെ അറസ്റ്റ് ചെയ്തു. വാഹനവും കസ്റ്റഡിയില്‍ എടുത്തു. അഗളി പൊലീസ് തുടര്‍ നടപടികള്‍ സ്വീകരിച്ചു. ന്യൂ ഇയര്‍ ആഘോഷങ്ങള്‍ക്കായി അട്ടപ്പാടിയിലേക്ക് വന്‍തോതില്‍ അനധികൃത മദ്യമൊഴുകുന്നത് തടയാനായി നിരീക്ഷണം ശക്തമാക്കിയതായി അഗളി എ.എസ്.പി അറിയിച്ചു.