കൊടകര: ഇരിങ്ങാലക്കുട രൂപത എജ്യുക്കേഷണല്‍ ട്രസ്റ്റിന്റെ കീഴിലുള്ള സഹൃദയ ഗ്രൂപ്പ് ഓഫ് ഇന്‍സ്റ്റിറ്റിയൂഷന്റെ പുതിയ സംരംഭമായ എം.ബി.എ കോളജ് (സഹൃദയ ഇന്‍സ്റ്റിറ്റിയുട്ട് ഓഫ് മാനേജ്‌മെന്റ് സ്റ്റഡീസ്) ബഹുമാനപ്പെട്ട കേരള ഗവര്‍ണര്‍ പി.സദാശിവം ഉദ്ഘാടനം ചെയ്യും. കൊടകര സഹൃദയ കോളജ് ഓഡിറ്റോറിയത്തില്‍ ഇന്ന് രാവിലെ 10 ന് നടക്കുന്ന ചടങ്ങില്‍ കേരള വിദ്യാഭ്യാസ മന്ത്രി പ്രൊഫ. സി.രവീന്ദ്രനാഥ് അധ്യക്ഷനാകും. ബിഷപ്പ് മാര്‍ പോളി കണ്ണൂക്കാടന്‍ മുഖ്യ പ്രഭാഷണം നടത്തും. ചാലക്കുടി എം.പി ഇന്നസെന്റ്, ബി.ഡി ദേവസി എം.എല്‍.എ, മാനേജര്‍ മോണ്‍. ലാസര്‍ കുറ്റിക്കാടന്‍ തുടങ്ങിയവര്‍ സംസാരിക്കും.
കൊടകര ഗ്രാമപഞ്ചായത്ത് കാരൂരില്‍ നിര്‍മിക്കുന്ന 'തണല്‍' വയോജന മന്ദിര നിര്‍മാണത്തിനുള്ള സംഭാവന ഗ്രാമപഞ്ചായത്ത് പ്രസിഡന്റ് പി.ആര്‍ പ്രസാദിന് കൈമാറും. രാഷ്ട്രീയ വിദ്യാഭ്യാസ സാമൂഹിക രംഗത്തെ പ്രമുഖര്‍ ചടങ്ങില്‍ പങ്കെടുക്കും. മാര്‍ക്കറ്റിങ് മാനേജ്‌മെന്റ്, ഫിനാന്‍ഷ്യല്‍ മാനേജ്‌മെന്റ്, ഇന്റര്‍നാഷണല്‍ ബിസിനസ് മാനേജ്‌മെന്റ്, ഹ്യുമന്‍ റിസോഴ്‌സസ് മാനേജ്‌മെന്റ്, ടുറിസം ആന്‍ഡ് ഹോസ്പ്പിറ്റാലിറ്റി മാനേജ്‌മെന്റ്, എന്നീ അഞ്ച് സ്‌പെഷ്യലൈസേഷനുകളാണ് ഇപ്പോള്‍ എം.ബി.എ കോളജിലുള്ളത്.