പത്തനംതിട്ട: എക്‌സൈസ് കമ്മീഷണറും ഡിജിപിയുമായ ഋഷിരാജ് സിങ് ഐപിഎസ് അയ്യപ്പ ജ്യോതിയില്‍ പങ്കെടുത്തതായി വ്യാജമായി ഫോട്ടോ നിര്‍മിച്ച് നവമാധ്യമത്തിലൂടെ പ്രചരിപ്പിച്ച യുവാവ് തിരുവല്ലയില്‍ അറസ്റ്റില്‍. ജെ. ജയന്‍ തിരുമുലപുരം എന്നയാളെയാണ് തിരുവല്ല പൊലിസ് അറസ്റ്റ് ചെയ്തത്.

ശബരിമല കര്‍മ്മ സമിതി സംഘടിപ്പിച്ച അയ്യപ്പജ്യോതിയില്‍ താന്‍ പങ്കെടുത്തുവെന്ന വ്യാജ പ്രചാരണത്തിനെതിരെ ഋഷിരാജ് സിങ് നേരത്തെ ഡി.ജി.പിയ്ക്ക് പരാതി നല്‍കിയിരുന്നു.

വ്യാഴാഴ്ച രാവിലെ മുതലാണ് സാമൂഹ്യ മാധ്യമങ്ങളില്‍ ഋഷിരാജ് സിങ് അയ്യപ്പ ജ്യോതിയില്‍ പങ്കെടുക്കുന്നെന്ന തരത്തിലുള്ള പ്രചരണങ്ങള്‍ വ്യാപകമായത്. 'ഡി.ജി.പി ഋഷിരാജ് സിങ് അയ്യപ്പജ്യോതിയില്‍ പങ്കെടുക്കുന്നു' എന്ന അടിക്കുറിപ്പോടെ അദ്ദേഹത്തോട് രൂപസാദൃശ്യമുള്ള വ്യക്തിയുടെ ചിത്രം ഉള്‍പ്പെടുത്തിയായിരുന്നു പ്രചാരണം.