പട്‌നഗുവാഹത്തി: കനത്ത മഴയെതുടര്‍ന്ന് ബിഹാറിലും അസമിലും വെള്ളപ്പൊക്കം രൂക്ഷം. ഇതിനിടയില്‍ സംസ്ഥാനങ്ങള്‍ക്ക് എല്ലാവിധ സഹായങ്ങളും കേന്ദ്ര സര്‍ക്കാര്‍ വാഗ്ദാനം ചെയ്തിട്ടുണ്ട്.
സംസ്ഥാനത്ത് ദുരിതാശ്വാസ പ്രവര്‍ത്തനങ്ങള്‍ക്ക് 10 കമ്പനി ദേശീയ ദുരന്ത നിവാരണ സേനയെ നിയോഗിക്കണമെന്ന് ബിഹാര്‍ മുഖ്യമന്ത്രി നിതീഷ് കുമാര്‍ കേന്ദ്രത്തോട് ആവശ്യപ്പെട്ടു. ഇവരെകൂടാതെ വ്യോമസേനയുടെ ഹെലികോപ്റ്ററിന്റെ സഹായവും തേടിയതായി മുഖ്യമന്ത്രി അറിയിച്ചു. വെള്ളപ്പൊക്ക ബാധിത മേഖല നേരിട്ട് കാണുന്നതിനായി മുഖ്യമന്ത്രി വ്യോമ നിരീക്ഷണം നടത്തി.
നേപ്പാളിലും കനത്ത മഴ തുടരുന്നതാണ് ദുരിതം രൂക്ഷമാക്കുന്നത്. നേപ്പാളില്‍ നിന്ന് ഉത്ഭവിച്ച് ബിഹാറിലൂടെ ഒഴുകുന്ന മഹാനന്ദ, കങ്കൈ നദികള്‍ അപകട നിലക്കും മുകളിലാണ്.
അസമിലും കനത്ത വെള്ളപ്പൊക്കം തുടരുന്ന സാഹചര്യത്തില്‍ എല്ലാ വിധ സഹായങ്ങളും പ്രധാനമന്ത്രി വാഗ്ദാനം ചെയ്തിട്ടുണ്ട്. സംസ്ഥാനത്തെ വെള്ളപ്പൊക്ക സ്ഥിതിയെക്കുറിച്ച് മുഖ്യമന്ത്രി സര്‍ബാനന്ദ സോനോവാള്‍ പ്രധാനമന്ത്രിയെ ധരിപ്പിച്ചിട്ടുണ്ട്.