തിരുവനന്തപുരം: ജില്ലാ അടിസ്ഥാനത്തില്‍ നോഡല്‍ ഐ.ടി.ഐകളില്‍ ജനുവരി മൂന്നു മുതല്‍ 21 വരെ സ്‌പെക്ട്രം ഐ.ടി.ഡി ജോബ് ഫെയര്‍ എന്നപേരില്‍ തൊഴില്‍ മേള സംഘടിപ്പിക്കും. വ്യാവസായിക പരിശീലന വകുപ്പിന്റെ ആഭിമുഖ്യത്തില്‍ ജില്ലാ അടിസ്ഥാനത്തില്‍ സംഘടിപ്പിക്കുന്ന തൊഴില്‍ മേളയില്‍ സര്‍ക്കാര്‍, സ്വകാര്യ ഐ.ടി.ഐകളില്‍ നിന്ന് പരിശീലനം പൂര്‍ത്തിയാക്കിയവര്‍ക്കും കമ്പനികളില്‍ നിന്ന് അപ്രന്റീസ് പരിശീലനം പൂര്‍ത്തിയാക്കിയവര്‍ക്കും പങ്കെടുക്കാം.
സംസ്ഥാനത്തെ വിവിധ ഐ.ടി.ഐകളില്‍ നിന്ന് വര്‍ഷം തോറും പുറത്തിറങ്ങുന്ന 76,000 ഓളം വിദ്യാര്‍ഥികള്‍ക്ക് ഇതിന്റെ പ്രയോജനം ലഭിക്കും. സ്‌പെക്ട്രം ഐ.ടി.ഡി ജോബ് ഫെയറില്‍ പങ്കെടുക്കുന്നതിനായി തൊഴിലന്വേഷകരും, തൊഴില്‍ദാതാക്കളും ംംം. ുെലരൃtuാഷീയ.െീൃഴ എന്ന വെബ്‌സൈറ്റില്‍ രജിസ്റ്റര്‍ ചെയ്യണം. തൊഴില്‍മേള നടക്കുന്ന വേദികളില്‍ നേരിട്ടെത്തി സ്‌പോട്ട് രജിസ്‌ട്രേഷന്‍ നടത്തുന്നതിനുള്ള സൗകര്യവും ലഭ്യമാണ്.
തൊഴില്‍മേളയുമായി ബന്ധപ്പെട്ട വിവരങ്ങള്‍ ഗവ. ഐ.ടി.ഐകളില്‍ നിന്ന് ലഭിക്കും. 2017ല്‍ നടന്ന സ്‌പെക്ട്രം 2017 തൊഴില്‍ മേളയില്‍ പങ്കെടുത്ത 800 ഓളം കമ്പനികളിലായി 5000 ത്തോളം പേര്‍ക്ക് തൊഴില്‍ ലഭ്യമായിട്ടുണ്ട്. സ്‌പെക്ട്രം ഐ.ടി.ഡി ജോബ് ഫെയറില്‍ രാജ്യത്തിനകത്തും പുറത്തും നിന്നുള്ള പ്രശസ്ത കമ്പനികളും കേന്ദ്ര സംസ്ഥാന പൊതുമേഖലാ സ്ഥാപനങ്ങളും തൊഴില്‍ ദാതാക്കളായി പങ്കെടുക്കും. ഐ.ടി.ഐ കോഴിക്കോട് (ജനുവരി മൂന്ന്), ഐ.ടി.ഐ കണ്ണൂര്‍ (ജനുവരി നാല്), ഐ.ടി.ഐ കാസര്‍കോഡ് (ജനുവരി അഞ്ച്), ഐ.ടി.ഐ കളമശ്ശേരി (ജനുവരി 10) ഐ.ടി.ഐ ചാക്കതിരുവനന്തപുരം (ജനുവരി 11, 12), ഐ.ടി.ഐ കല്‍പ്പറ്റ (ജനുവരി 14), ഐ.ടി.ഐ അരീക്കോട് മലപ്പുറം, ഐ.ടി.ഐ ചെങ്ങന്നൂര്‍ആലപ്പുഴ (ജനുവരി 15), ഐ.ടി.ഐ കട്ടപ്പന, ഐ.ടി.ഐ ചെന്നീര്‍ക്കര പത്തനംതിട്ട (ജനുവരി 16), ഐ.ടി.ഐ മലമ്പുഴ (ജനുവരി 17), ഐ.ടി.ഐ ചാലക്കുടി തൃശ്ശൂര്‍, ഐ.ടി.ഐ ഏറ്റുമാനൂര്‍ (ജനുവരി 18), ഐ.ടി.ഐ ചന്ദനത്തോപ്പ് (ജനുവരി 21) എന്നിങ്ങനെയാണ് ജോബ് ഫെയര്‍ നടക്കുക.
വിവരങ്ങള്‍ക്ക് ഐ.ടി.ഐയിലോ മേഖല കോഓര്‍ഡിനേറ്ററുമായോ ബന്ധപ്പെടുക.