കൊല്ലം: ഷാഡോ പൊലിസ് ചമഞ്ഞ് പിന്നണി ഗായികയെ കാറില്‍നിന്നു പിടിച്ചിറക്കി തട്ടിക്കൊണ്ടുപോകാന്‍ ശ്രമിച്ച കേസില്‍ പ്രതിയായ യുവാവ് റിമാന്‍ഡില്‍.
ശനിയാഴ്ച അര്‍ധരാത്രി 11.30ന് ഉമയനല്ലൂരില്‍ ദേശീയപാതയിലായിരുന്നു സംഭവം. നെടുമ്പന പഞ്ചായത്ത് ഓഫിസിന് സമീപം തെക്കേ ചരുവിളവീട്ടില്‍ മനാഫുദ്ദീനാ(42)ണ് റിമാന്റിലായത്. സംഭവത്തിന്റെ യാഥാര്‍ഥ്യം വ്യക്തമാക്കുന്നതിനായി ഗായിക തന്നെ രംഗത്തെത്തി.ഫേസ്ബുക്ക് ലൈവില്‍ വന്നാണ് ഇക്കാര്യങ്ങള്‍ വെളിപ്പെടുത്തിയത്. യുവാവിനെതിരേ നിയമനടപടിയെടുക്കുമെന്ന് ഇവര്‍ പ്രതികരിച്ചു. ഗാനമേള കഴിഞ്ഞ് മടങ്ങുന്നതിനിടെ ഗായികയും ട്രൂപ്പിലെ മറ്റംഗങ്ങളും ഉമയനല്ലൂര്‍ ജങ്ക്ഷനില്‍ ചായ കുടിക്കാനിറങ്ങിയിരുന്നു. ഗായികയുടെ കാറിനടുത്തെത്തിയ മനാഫുദ്ദീന്‍ താന്‍ ഷാഡോ പൊലിസാണെന്നാണ് സ്വയം പരിചയപ്പെടുത്തിയത്.
ഗായികയും സംഘവും കാറിലിരുന്ന് മദ്യപിക്കുന്നത് സി.സി ടി.വി കാമറയില്‍ പതിഞ്ഞിട്ടുണ്ടെന്ന് പറഞ്ഞ യുവാവ്, കാറിന്റെ താക്കോല്‍ ബലമായി ഊരിയെടുത്തു.ഇതിന് പിന്നാലെ ഗായികയുടെ കൈയില്‍ കടന്നുപിടിച്ച് അവരെ കാറില്‍ നിന്നു വലിച്ചിറക്കാനും ശ്രമിച്ചു. യുവാവ് കടന്നുപിടിച്ചതോടെ ഗായിക ഉറക്കെ നിലവിളിക്കുകയും ബഹളം വെയ്ക്കുകയും ചെയ്തു. ഇതോടെയാണ് സമീപത്തുണ്ടായിരുന്നവര്‍ സംഭവമറിയുന്നത്. നിലവിളി കേട്ട് ഓടിക്കൂടിയ നാട്ടുകാര്‍ യുവാവിനെ തടഞ്ഞുവെയ്ക്കുകയായിരുന്നു.
ഇതിനിടെ നാട്ടുകാരില്‍ ചിലര്‍ ഇയാളെ കൈയേറ്റം ചെയ്യാന്‍ ശ്രമിച്ചതും ബഹളത്തിനിടയാക്കി. സംഭവമറിഞ്ഞ് കൊട്ടിയം എസ്.ഐ ആര്‍. രതീഷ്, ജൂനിയര്‍ എസ്.ഐ സുരേഷ് ബാബു എന്നിവരുടെ നേതൃത്വത്തിലുള്ള പൊലിസ് സംഘം സ്ഥലത്തെത്തി യുവാവിനെ കസ്റ്റഡിയിലെടുത്തു. നാട്ടുകാരുടെ മര്‍ദനമേറ്റ യുവാവിനെ ആദ്യം കൊട്ടിയത്തെ സ്വകാര്യ ആശുപത്രിയിലെത്തിച്ച് ചികിത്സ നല്‍കിയ ശേഷമാണ് പൊലിസ് സ്റ്റേഷനിലേക്ക് കൊണ്ടുപോയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.