മെല്‍ബണ്‍: ആസ്‌ത്രേലിയന്‍ ക്യാപ്റ്റന്‍ ടിം പെയ്‌നിനെ പരിഹസിച്ച് ഇന്ത്യന്‍ വിക്കറ്റ് കീപ്പര്‍ ഋഷഭ് പന്ത്. തന്നെ പരിഹസിച്ച ടിം പെയ്‌നിനെ അതേ നാണയത്തില്‍ തന്നെ ഋഷഭ് പന്ത് തിരിച്ചടിച്ചു. 'നമുക്ക് ഒരു വിശിഷ്ടാതിഥിയുണ്ട് മായങ്ക് 'എന്ന് പറഞ്ഞാണ് ഋഷഭ് സംസാരം തുടങ്ങിയത്. ടെംപററി ക്യാപ്റ്റന്‍ (താല്‍ക്കാലിക ക്യാപ്റ്റന്‍) എന്ന വാക്ക് കേട്ടിട്ടുണ്ടോയെന്നും പെയ്ന്‍ താല്‍ക്കാലിക ക്യാപ്റ്റന്‍ ആണെന്നുമായിരുന്നു ഋഷഭിന്റെ സംസാരം. അവനെ പുറത്താക്കാന്‍ പ്രത്യേകിച്ച് ഒന്നും ആവശ്യമില്ലെന്നും അവന് സംസാരിക്കാന്‍ മാത്രമേ അറിയൂ എന്നും ഋഷഭ് പറഞ്ഞു. പിന്നീട് ജഡേജയുടെ പന്തില്‍ പന്തിന് ക്യാച്ച് നല്‍കിയാണ് പെയ്ന്‍ മടങ്ങിയത്.

നേരത്തെ ഇന്ത്യന്‍ താരങ്ങള്‍ ബാറ്റ് ചെയ്യുമ്പോള്‍ പെയ്‌നും പ്രകോപിപ്പിക്കാന്‍ ശ്രമിച്ചിരുന്നു. രോഹിത് ശര്‍മയെയും ഋഷഭ് പന്തിനെയുമായിരുന്നു പെയ്ന്‍ പരിഹസിച്ചത്. ആസ്‌ത്രേലിയക്കെതിരേയുള്ള ഏകദിന ക്രിക്കറ്റ് ടീമില്‍ നിന്ന് പുറത്താക്കപ്പെട്ട ഋഷഭിനോട് ബിഗ്ബാഷ് ലീഗില്‍ ഹരിക്കൈന്‍സിന് വേണ്ടി കളിക്കുന്നോയെന്നും ഞങ്ങള്‍ക്ക് ഒരു ബാറ്റ്‌സ്മാനെ വേണമെന്നുമായിരുന്നു പെയ്ന്‍ ആദ്യം പറഞ്ഞത്. ഋഷഭ് പന്ത് മറുപടി പറയാതെ ബാറ്റ് ചെയ്‌തെങ്കിലും അവധി ദിവസം ആഘോഷിക്കാന്‍ ഹൊബാര്‍ട്ടിലേക്ക് വരൂ... നല്ലൊരു അപാര്‍ട്‌മെന്റ് സംഘടിപ്പിച്ച് തരാം. വീട്ടില്‍ നിന്നു കുട്ടികളെ നോക്കി തന്നാല്‍ എനിക്കും ഭാര്യക്കും രാത്രി സിനിമയ്ക്കു പോവാമായിരുന്നുവെന്നും പെയ്ന്‍ പറഞ്ഞിരുന്നു. ഇതിന് മറുപടിയായിരുന്നു ഇന്നലെ പന്തിന്റെ പ്രതികരണം.