ഷൊര്‍ണൂര്‍: എട്ടുദിവസങ്ങള്‍ക്കു ശേഷം മേഖലയില്‍ കുടിവെള്ളം ലഭിച്ചു. വാട്ടര്‍ അതോറിറ്റിയാണ് കുടിവെള്ളം വിതരണം ചെയ്യുന്നത്. ഭാരതപ്പുഴയിലുള്ള പമ്പ്ഹൗസിലെ മോട്ടോറുകള്‍ തകരാറായതാണ് കുടി വെള്ളം മുടങ്ങാന്‍ കാരണമായതെന്ന് ജല അതോറിറ്റി പറയുന്നു. മൂന്നു മോട്ടോറുകളാണ് ഇവിടെയുള്ളത്. ഇതില്‍ രണ്ടെണ്ണം കേടുവന്നതാണ് കുടിവെള്ള വിതരണത്തിന് തടസമായത്.
25 വര്‍ഷത്തിലധികം പഴക്കമുള്ള മോട്ടോറുകളാണ് ഇവിടെയുള്ളത്. മോട്ടോറുകള്‍ പുതിയത് വാങ്ങണമെന്ന് ആവശ്യപ്പെട്ട് ഉദ്യോഗസ്ഥര്‍ മേല്‍ അധികാരികള്‍ക്ക് നിവേദനങ്ങളും മുന്നറിയിപ്പുകളും നല്‍കിയെങ്കിലും അനുകൂല നടപടികള്‍ സ്വീകരിച്ചിട്ടില്ല. കുടിവെള്ളം വിതരണം ചെയ്യണമെന്നാവശ്യപ്പെട്ട് രാഷ്ട്രീയകക്ഷികള്‍ അതോറിറ്റി ഓഫിസിനു മുന്നില്‍ പ്രക്ഷോഭം നടത്തിയിരുന്നു.