ഫറോക്ക്: ഫാറൂഖ് കോളജില്‍ യൂനിയന്‍ തെരെഞ്ഞെടുപ്പ് വിജയാഹ്ലാദവുമായി ബന്ധപ്പെട്ട് സസ്‌പെന്റ് ചെയ്ത വിദ്യാര്‍ഥികളെ തിരിച്ചെടുക്കണമെന്നാവശ്യപ്പെട്ട് നടത്തിയ സമരത്തിന് നേതൃത്വം നല്‍കിയ ആറ് വിദ്യാര്‍ഥികളെ പൊലിസ് അറസ്റ്റ് ചെയ്തു. എം.എസ്.എഫ് കോളജ് യൂനിറ്റ് പ്രസിഡന്റ് മഷ്ഹൂദ് കൊട്ടപ്പുറം, ജില്ലാ കമ്മിറ്റിയംഗം ഷമീര്‍ പാഴൂര്‍, ഇല്യാസ്, ജസീല്‍, റിസ്‌വാന്‍, സി.എച്ച് മുഹമ്മദ് എന്നിവരെയാണ് ഫറോക്ക് പൊലിസ് അറസ്റ്റു ചെയ്തത്. കഴിഞ്ഞ വ്യാഴാഴ്ച എം.എസ്.എഫ് വിജയാഹ്ലാദ പ്രകടനത്തിനിടെ കോളജ്‌ഗേറ്റിന് മുകളില്‍ കയറി എം.എസ്.എഫ് പതാക വീശിയ സംഭവവുമായി ബന്ധപ്പെട്ട് ആദില്‍, അനിസ്, അലി എന്നീ വിദ്യാര്‍ഥികളെ സസ്‌പെന്റു ചെയ്തിരുന്നു. തുടര്‍ന്ന് ഇവരെ തിരിച്ചെടുക്കണമെന്നാവശ്യപ്പെട്ട് പ്രിന്‍സിപ്പലിന്റെ ഓഫിസിന് മുന്നില്‍ സമരം നടത്തുകയും എം.എസ്.എഫ് പതാക സ്ഥാപിക്കുകയും ചെയ്തതില്‍ എം.എസ്.എഫ് യൂനിറ്റ് സെക്രട്ടറി ആദില്‍ ജഹാനെയും സസ്‌പെന്റ് ചെയ്യുകയായിരുന്നു. ഇതിന് പിന്നാലെയാണ് സസ്‌പെന്റ് ചെയ്യപ്പെട്ടവരെ തിരിച്ചെടുക്കണമെന്നാവശ്യപ്പെട്ട് എം.എസ്.എഫിന്റെ നേതൃത്വത്തില്‍ രാപകല്‍ സമരം ആരംഭിച്ചത്. എം.എസ്.എഫ് ജില്ലാ സെക്രട്ടറി ഷുഹൈബ് സമരം ഉദ്ഘാടനം ചെയ്തു. അനസ്, ഫാഹി അഹമ്മദ് സംസാരിച്ചു.