മുക്കം: മുക്കത്ത് യുവാവിനുനേരെ സദാചാര ഗുണ്ടാ ആക്രമണം.
 ബന്ധുവായ യുവതിയുമായി റോഡരികില്‍ സംസാരിച്ചിരുന്ന യുവാവിന് മര്‍ദ്ദനമേറ്റു. മലപ്പുറം പെരിന്തല്‍മണ്ണ സ്വദേശി മുഹമ്മദാണ് അക്രമത്തിന് ഇരയായത്. ഇന്നലെ വൈകുന്നേരം നോര്‍ത്ത് കാരശ്ശേരി പെട്രോള്‍ പമ്പിന് സമീപത്ത് ബന്ധുവുമായി സംസാരിച്ച് നില്‍ക്കെയാണ് ഒരുസംഘം ഇദ്ദേഹത്തെ ക്രൂരമായി മര്‍ദിച്ചത്.
കരിപ്പൂരില്‍നിന്ന് ബിസിനസ് ആവശ്യാര്‍ഥം താമരശ്ശേരിയിലേക്ക് പോവുന്ന സംഘവും ഇവരുടെ ബന്ധുക്കളായ നിലമ്പൂര്‍ സ്വദേശികളും തമ്മില്‍ സംസാരിക്കുന്നതിനിടെയാണ് ഒരു സംഘം അസഭ്യവര്‍ഷവുമായി വന്ന് മര്‍ദിച്ചത്.
മര്‍ദനത്തില്‍ ചെവിക്കും നെഞ്ചിലും ഗുരുതരമായി പരുക്കേറ്റ മുഹമ്മദിനെ മുക്കം സി.എച്ച്.സിയില്‍ പ്രവേശിപ്പിച്ചു. ബന്ധുക്കള്‍ മുക്കം പൊലിസില്‍ പരാതി നല്‍കി.