ആലപ്പുഴ: പൊതുഖജനാവിലെ പണം ഉപയോഗിച്ച് മന്ത്രി തോമസ്ചാണ്ടിയുടെ റിസോര്‍ട്ടിലേക്ക് റോഡ് നിര്‍മിച്ചതിനെതിരെ വ്യാപക പ്രതിഷേധം.ഗതാഗത മന്ത്രി തോമസ് ചാണ്ടിയുടെ ലേക്ക് പാലസ് റിസോര്‍ട്ടിലേക്ക് മാത്രമായി ലക്ഷങ്ങള്‍ ചെലവഴിച്ച് ഹാര്‍ബര്‍ എന്‍ജിനീയറിംഗ് വിഭാഗമാണ് റോഡ് ടാറിംഗ് നടത്തിയത്.ഇതിനായി 28.5 ലക്ഷം രൂപയാണ് വകുപ്പ് ചെലവഴിച്ചത്.ആലപ്പുഴ നഗരത്തിലെ വലിയകുളം മുതല്‍ സീറോ ജെട്ടിവരെ ഒരു കിലോമീറ്റര്‍ നീളമുള്ള റോഡില്‍ റിസോര്‍ട്ട് വരെയുള്ള നാനൂറ് മീറ്റര്‍ മാത്രമാണ് ടാറിംഗ് നടത്തിയതെന്നതാണ് പരാതിക്കിടയാക്കിയത്.റോഡിന്റെ ശേഷിച്ച ഭാഗത്തിന് ലേക്ക് പാലസ് വരെയുള്ളതിന്റെ വീതിയുമില്ല.നേരത്തെ പി ജെ കുര്യന്‍, കെ ഇ ഇസ്മാഈല്‍ എന്നിവരുടെ എംപി ഫണ്ടുപയോഗിച്ചാണ് പാടം നികത്തി ഈ റോഡ് നിര്‍മിച്ചത്.നാല് മീറ്ററായിരുന്നു തുടക്കം മുതല്‍ സീറോ ജെട്ടി വരെയുള്ള റോഡിന്റെ വീതി.ടാറിംഗ് നടത്തിയ റിസോര്‍ട്ട് വരെയുള്ള ഭാഗത്തെ റോഡിന്റെ വീതി ആറും ഏഴും മീറ്ററാണ്.പൊതുഖജനാവില്‍ നിന്നുള്ള ഫണ്ട് ഉപയോഗിച്ച് സ്വന്തം റിസോര്‍ട്ടിലേക്ക് റോഡ് ടാറിംഗ് നടത്തിയ സംഭവം ഒരു സ്വകാര്യ ചാനലാണ് പുറത്ത് കൊണ്ടുവന്നത്.എന്നാല്‍ തുടക്കത്തില്‍ ഇതിനെതിരെ ആരും രംഗത്ത് വന്നില്ലെങ്കിലും മന്ത്രിയുടെ ക്രമക്കേടുകള്‍ സംബന്ധിച്ച് കൂടുതല്‍ വാര്‍ത്തകള്‍ പുറത്തുവന്നതോടെ ഇടതുപക്ഷം ഒഴികെയുള്ള പാര്‍ട്ടികള്‍ പ്രതിഷേധവുമായി രംഗത്ത് വന്നുകഴിഞ്ഞു.
മന്ത്രിയുടെ പാര്‍ട്ടിയുടെ യുവജന വിഭാഗവും പ്രതിഷേധവുമായി രംഗത്ത് വന്നത് തിരിച്ചടിയായിരിക്കുകയാണ്.മന്ത്രി പൊതുഫണ്ട് ചെലവഴിച്ച് റിസോര്‍ട്ടിലേക്ക് റോഡ് നിര്‍മ്മിച്ചതടക്കമുള്ള കാര്യങ്ങള്‍ അന്വേഷിക്കണമെന്ന് കോഴിക്കോട് ചേര്‍ന്ന നാഷ്ണലിസ്റ്റ് യൂത്ത് കോണ്‍ഗ്രസ്സ് ജില്ലാ കേഡര്‍ ക്യാംപ് പ്രമേയത്തില്‍ ആവശ്യപ്പെട്ടു.മന്ത്രി പാര്‍ട്ടിക്ക് അതീതമായി പ്രവര്‍ത്തിക്കുകയാണ്. ഇത് നിയന്ത്രിക്കാന്‍ സംസ്ഥാന എന്‍ സി പി നേതൃത്വം തയ്യാറാകണമെന്നും യൂത്ത് കോണ്‍ഗ്രസ് പ്രമേയത്തിലൂടെ ആവശ്യപ്പെട്ടു.
അതിനിടെ മന്ത്രിയുടെ റിസോര്‍ട്ടിലേക്ക് പൊതുഖജനാവില്‍ നിന്ന് പണം മുടക്കി റോഡ് നിര്‍മാണം നടത്തിയ ഹാര്‍ബര്‍ എന്‍ജിനീയറിംഗ് ഓഫീസ് ഇന്നലെ യുവമോര്‍ച്ച പ്രവര്‍ത്തകര്‍ ഉപരോധിച്ചു.പോലീസ് പിന്നീട് പ്രവര്‍ത്തകരെ അറസ്റ്റ് ചെയ്ത് നീക്കി.