കൊച്ചി: നടി ആക്രമിക്കപ്പെട്ട കേസില്‍ രമ്യാ നമ്പീശനില്‍നിന്ന് അന്വേഷണസംഘം മൊഴിയെടുത്തു. ആലുവ പൊലിസ് ക്ലബിലേക്കു വിളിപ്പിച്ചാണ് മൊഴി രേഖപ്പെടുത്തിയത്. സിനിമയുടെ സെറ്റില്‍നിന്ന് കൊച്ചിയിലെ രമ്യയുടെ വീട്ടിലേക്കു പോവുമ്പോഴാണ് നടി ആക്രമിക്കപ്പെട്ടത്. ഇത് കണക്കിലെടുത്താണ് അന്വേഷണസംഘം രമ്യയെ ആലുവ പൊലിസ് ക്ലബിലേക്കു വിളിച്ചുവരുത്തിയത്. എ.ഡി.ജി.പി ബി. സന്ധ്യയുടെ നേതൃത്വത്തിലുള്ള സംഘമാണ് രമ്യയില്‍നിന്ന് വിവരങ്ങള്‍ ചോദിച്ചറിഞ്ഞത്.
അതിനിടെ, കേസിലെ 'മാഡം' ആരാണെന്ന് അടുത്തതവണ വെളിപ്പെടുത്തുമെന്ന് മുഖ്യപ്രതിയായ പള്‍സര്‍ സുനി മാധ്യമപ്രവര്‍ത്തകരോടു പറഞ്ഞു. 'മാഡം' ആരാണെന്ന് ഓഗസ്റ്റ് 16ന് വെളിപ്പെടുത്തുമെന്നായിരുന്നു സുനി നേരത്തെ പറഞ്ഞിരുന്നത്.
സുനിയെ കാക്കനാട് ജില്ലാ ജയിലില്‍നിന്ന് വിയ്യൂര്‍ ജയിലിലേക്കു മാറ്റി. സുരക്ഷ കണക്കിലെടുത്തും വിഡിയോ കോണ്‍ഫറന്‍സിനുള്ള സൗകര്യം പരിഗണിച്ചുമാണ് ജയില്‍ മാറ്റുന്നതെന്നാണ് ഔദ്യോഗിക വിശദീകരണം.