അഹമ്മദാബാദ്: ഗുജറാത്തില്‍ രാജ്യസഭാ തെരഞ്ഞെടുപ്പില്‍ കോണ്‍ഗ്രസിനെ പ്രതിസന്ധിയിലാക്കി പാര്‍ട്ടിയില്‍ നിന്ന് രാജിവച്ച ശങ്കര്‍ സിങ് വഗേല ഇന്നലെ എം.എല്‍.എ സ്ഥാനവും രാജിവച്ചു.
കോണ്‍ഗ്രസ് നേതൃത്വത്തോട് കലഹിച്ചാണ് കഴിഞ്ഞമാസം അദ്ദേഹം പാര്‍ട്ടി വിട്ടത്. ഇന്നലെ നിയമസഭാ സ്പീക്കര്‍ രമണ്‍ലാല്‍ വോറയ്ക്ക് രാജിക്കത്ത് നല്‍കി. മുഖ്യമന്ത്രിയും ബി.ജെ.പി നേതാവുമായ വിജയ് രൂപാണി, ഉപമുഖ്യമന്ത്രി നിതിന്‍ പട്ടേല്‍, മുതിര്‍ന്ന ബി.ജെ.പി മന്ത്രിമാരായ ഭൂപേന്ദ്ര സിങ് ചുദസാമ, പ്രദീപ് സിങ് ജഡേജ എന്നിവര്‍ക്കൊപ്പമെത്തിയാണ് അദ്ദേഹം രാജിക്കത്ത് നല്‍കിയത്.
നേരത്തെ തന്നെ എം.എല്‍.എ സ്ഥാനം രാജിവയ്ക്കാന്‍ തീരുമാനിച്ചിരുന്നു. എന്നാല്‍ തന്നെ വിജയിപ്പിച്ച മണ്ഡലത്തിലെ ജനങ്ങളെ സന്ദര്‍ശിച്ച് ചര്‍ച്ച നടത്താനിരുന്നതുകൊണ്ടാണ് രാജിവൈകിയതെന്ന് അദ്ദേഹം പറഞ്ഞു.