പള്ളിക്കല്‍: കാവുംപടിയില്‍ ആള്‍താമസമില്ലാത്ത വീട്ടില്‍ നിന്നു വിലപിടിപ്പുള്ള കാസ്‌ട്രേണ്‍ ഉരുപ്പടികള്‍ മോഷ്ടിച്ചു കടത്താനുള്ള ശ്രമത്തിനിടെ ഒരു സ്ത്രീയുള്‍പ്പെടെ മൂന്ന് തമിഴ് നാടോടികളെ നാട്ടുകാര്‍ പിടികൂടി പൊലിസിന് കൈമാറി. ഓരാള്‍ സംഭവസമയം ഓടി രക്ഷപ്പെട്ടെങ്കിലും പള്ളിക്കല്‍ ബസാര്‍ ടൗണി വച്ച് നാട്ടുകാര്‍ പിന്നീട് പിടികൂടുകയായിരുന്നു.
മതിലുകള്‍ക്കും വീടുകള്‍ക്കും മുകള്‍ ഭാഗങ്ങളില്‍ സ്ഥാപിക്കുന്ന 30 കിലോ ഭാരമുള്ള മുപ്പത്തിയഞ്ചോളം ഉരുപ്പടികള്‍ വീട്ടില്‍ നിന്നു നഷ്ടപ്പെട്ടിരുന്നു. ഒന്നിന് 500 രൂപയിലേറെ വില വരും. ഇന്നലെ വൈകിട്ട് ആള്‍ താമസമില്ലാത്ത വീട്ടില്‍ നിന്നും ബാക്കിയുള്ള സാധനങ്ങള്‍ കയറ്റി കൊണ്ടു പോകാനുള്ള ശ്രമത്തിനിടെ സംശയം തോന്നിയ ഒരു ഓട്ടോറിക്ഷാ ഡ്രൈവര്‍ നാട്ടുകാരെ വിളിച്ചുകൂട്ടി ഇവരെ  പിടികൂടുകയായിരുന്നു.