പാരിസ്: സ്‌പെയിനിന്റെ മുന്‍ ഒളിംപിക് റോഡ് റേസ് ചാംപ്യന്‍ സാമുവല്‍ സാഞ്ചസ് ഉത്തേജക പരിശോധനയില്‍ പരാജയപ്പെട്ടു. സാഞ്ചസ് തങ്ങള്‍ നടത്തിയ പരിശോധനയില്‍ പരാജയപ്പെട്ടതായി സൈക്ലിങ് ആന്‍ഡി ഡോപിങ് ഗവേണിങ് ബോഡി അറിയിച്ചു. ഓഗസ്റ്റ് ഒന്‍പതിന് എടുത്ത സാംപിളുകളില്‍ നിരോധിത ഉത്തേജക മരുന്നുകളുടെ സാന്നിധ്യമുണ്ടെന്ന് ഗവേണിങ് ബോഡി പറഞ്ഞു.
ഹോര്‍മോണുള്ള വളര്‍ച്ചയ്ക്കുള്ള മരുന്നുകളാണ് ഇവ. അന്താരാഷ്ട്ര ഉത്തേജകവിരുദ്ധ സമിതി നിരോധിച്ച മരുന്നാണ് ഇത്. അതേസമയം സാഞ്ചസിന് ബി സാംപിളുകള്‍ പരിശോധനയ്ക്ക് അയക്കാം. അതേസമയം താരത്തെ അന്വേഷണവിധേയമായി സസ്‌പെന്‍ഡ് ചെയ്തതായി ഉത്തേജക വിരുദ്ധ സമിതി അറിയിച്ചു. 2008ല്‍ ബെയ്ജിങില്‍ നടന്ന ഒളിംപിക്‌സില്‍ റോഡ് റേസ് വിഭാഗത്തില്‍ സ്വര്‍ണം നേടിയിരുന്ന താരമാണ് സാഞ്ചസ്.
സ്‌പെയിനില്‍ നടക്കുന്ന വ്യൂള്‍ട്ട എസ്പാന സൈക്ലിങ് ടൂര്‍ണമെന്റില്‍ താരം പങ്കെടുക്കാനിരിക്കെയാണ് ഫലം പുറത്തുവന്നത്. ടൂര്‍ണമെന്റില്‍ നിന്ന് പിന്‍മാറുന്നതായി താരം പ്രഖ്യാപിച്ചിട്ടുണ്ട്. സാഞ്ചസിന് പകരം ബെല്‍ജിയത്തിന്റെ ലോയിക് വിലെജനെ ടീമില്‍ ഉള്‍പ്പെടുത്തിയിട്ടുണ്ട്.