പയ്യന്നൂര്‍: വിവാഹ വാഗ്ദാനം നല്‍കി പ്ലസ് വണ്‍ വിദ്യാര്‍ഥിനിയെ പീഡിപ്പിച്ച കേസില്‍ കാമുകനെയും സുഹൃത്തിനെയും അറസ്റ്റു ചെയ്തു. മാത്തിലിലെ ഓട്ടോ ഡ്രൈവറായ ആലപ്പടമ്പ് സ്വദേശി കുന്നത്ത് ചാലില്‍ വീട്ടില്‍ വിനീഷ്(27), പെണ്‍കുട്ടിയെ ഓട്ടോയില്‍ കൂട്ടിക്കൊണ്ടുപോയ കുഞ്ഞുവീട്ടില്‍ സന്ദീപ്(28) എന്നിവരെയാണ് പയ്യന്നൂര്‍ സി.ഐ എം.പി ആസാദും സംഘവും അറസ്റ്റ് ചെയ്തത്.
ഒരു വര്‍ഷത്തോളം പ്രണയാഭ്യര്‍ഥന നടത്തി പിറകെ വരികയും തുടര്‍ന്ന് വിവാഹ വാഗ്ദാനം നല്‍കി പ്രലോഭിപ്പിച്ച് മാത്തിലിന് സമീപത്തെ ഹോട്ടലിലും വിനീഷിന്റെ വീട്ടിലും കൊണ്ടുപോയി കഴിഞ്ഞ ജൂലൈ മുതല്‍ പീഡിപ്പിക്കുകയായിരുന്നെന്ന് പെണ്‍കുട്ടി നല്‍കിയ പരാതിയില്‍ പറയുന്നു. സ്‌കൂള്‍ അധികൃതര്‍ മുഖേന ചൈല്‍ഡ്‌ലൈനില്‍ നല്‍കിയ പരാതിയെ തുടര്‍ന്നാണ് പൊലിസ് കേസെടുത്തത്.
പ്രതികള്‍ക്കെതിരേ പോക്‌സോ വകുപ്പുകളാണ് ചുമത്തിയിട്ടുള്ളത്. പയ്യന്നൂര്‍ ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി പ്രതികളെ റിമാന്‍ഡ് ചെയ്തു.