ഇരിട്ടി: ബസില്‍ യാത്രചെയ്യുകയായിരുന്ന യുവതിയുടെ പണമടങ്ങിയ പഴ്‌സ് മോഷ്ടിച്ച മൂന്ന് യുവതികളെ ഇരിട്ടി പൊലിസ് അറസ്റ്റ് ചെയ്തു. തമിഴ്‌നാട് സ്വദേശിനികളായ മീനാക്ഷി(19), ദേവി (19), പൊന്നി (20) എന്നിവരെയാണ് ഇരിട്ടി എസ്.ഐ സഞ്ജയ്കുമാര്‍ അറസ്റ്റ് ചെയ്തത്. ബുധനാഴ്ച വൈകുന്നേരം കീഴൂര്‍ കുന്നില്‍ നിന്നു ഇരിട്ടിയിലേക്കു വരികയായിരുന്ന യുവതിയുടെ പഴ്‌സാണ് ഇവര്‍ കവര്‍ന്നത്. ബസില്‍ നിന്നു പ്രതികള്‍ യുവതിയുമായി വഴക്കുണ്ടാക്കിയിരുന്നു. ഇരിട്ടിയിലെത്തി ബസിറങ്ങിയപ്പോഴാണ് പഴ്‌സ് നഷ്ടപ്പെട്ട കാര്യം ഇവര്‍ അറിയുന്നത്. ഇതിനിടെ ഇരിട്ടി താലൂക്ക് ആശുപത്രി പരിസരത്തെത്തിയ മൂന്നംഗ സംഘത്തെകുറിച്ച് ചിലര്‍ സംശയം തോന്നി പൊലിസില്‍ വിവരമറിയിക്കുകയായിരുന്നു. ഇവരെ സ്റ്റേഷനില്‍ ചോദ്യം ചെയ്യുന്നതിനിടെയാണ് പഴ്‌സ് നഷ്ടപ്പെട്ട യുവതി പരാതിയുമായി എത്തിയത്. പരിശോധനയില്‍ ഇവരില്‍ നിന്നു മോഷണം പോയ പഴ്‌സും പണവും പൊലിസ് കണ്ടെടുക്കുകയായിരുന്നു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.