കുമ്പള: കട്ടത്തടുക്കയിലെ അബ്ദുല്ലക്കുഞ്ഞിയുടെ വീട്ടില്‍ നിന്നു കവര്‍ന്ന പതിനഞ്ചേമുക്കാല്‍ പവന്‍ സ്വര്‍ണാഭരണങ്ങള്‍ ഉള്ളാളിലെ ജ്വല്ലറി വര്‍ക്ക്‌സില്‍ നിന്നു കണ്ടെത്തി. കവര്‍ച്ചാക്കേസില്‍ പ്രതികളായ മഞ്ചേശ്വരം കുടുക്കയിലെ മുഹമ്മദ് ശിഹാബ്(21), ദേര്‍ളകട്ട മഞ്ഞനാടിയിലെ മുദസിര്‍ എന്ന മുദ്ദ(22), അന്‍സാഫ് (20) എന്നിവരെയും കൊണ്ടു കുമ്പള അഡി. എസ്.ഐ ബാബു എ. തോമസും സംഘവും നടത്തിയ തെളിവെടുപ്പിനിടെയാണു സ്വര്‍ണാഭരണങ്ങള്‍ കണ്ടെത്തിയത്.
രണ്ടര ലക്ഷം രൂപക്കാണ് ഇവ വില്‍പന നടത്തിയതെന്നാണു പ്രതികളുടെ മൊഴി. ഈ തുക മംഗളൂരു, മൈസൂരു എന്നിവിടങ്ങളിലെ ബാറുകളിലും ഡാന്‍സ് ബാറുകളിലും പോയി ചെലവഴിച്ചുവെന്നാണു പ്രതികള്‍ മൊഴി നല്‍കിയിട്ടുള്ളത്.
ഏതാനും ദിവസം മുമ്പു പൊലിസ് നടത്തിയ വാഹന പരിശോധനക്കിടെയാണു മൂന്നു പേര്‍ സഞ്ചരിക്കുകയായിരുന്ന ബൈക്ക് കസ്റ്റഡിയിലെടുത്തത്. പ്രതികളിലൊരാളുടെ കൈവശം ഐ ഫോണ്‍ 7 കണ്ടതു സംശയത്തിനിടയാക്കി.
തുടര്‍ന്നു ചോദ്യം ചെയ്തപ്പോഴാണു കട്ടത്തടുക്കയിലെ കവര്‍ച്ച തെളിഞ്ഞത്. കട്ടത്തടുക്കയില്‍ നിന്നു കവര്‍ന്ന മൊബൈല്‍ ഫോണും വാച്ചും ഇവരില്‍ നിന്നു കണ്ടെടുത്തിരുന്നു.
പെര്‍മുദെ മണ്ടെക്കാപ്പിലെ ഹോട്ടല്‍ വ്യാപാരിയുടെ വീട് കുത്തിത്തുറന്ന് 15 പവന്‍ സ്വര്‍ണാഭരണങ്ങള്‍ കവര്‍ന്നതും ഇതേ സംഘമാണെന്നു പൊലിസ് പറഞ്ഞു.
ഇവിടത്തെ സ്വര്‍ണം കണ്ടെത്താനായിട്ടില്ല.