റിയാദ്: അടുത്തിടെ അവസാനിച്ച സഊദി പൊതുമാപ്പില്‍ ഏഴു ലക്ഷം പേര്‍ രാജ്യം വിട്ടതായി സഊദി പാസ്‌പോര്‍ട്ട് വിഭാഗം മേധാവി മേജര്‍ ജനറല്‍ സുലൈമാന്‍ അല്‍യഹ്‌യ വ്യക്തമാക്കി. പൊതുമാപ്പ് സമയത്ത് രേഖകള്‍ ശരിപ്പെടുത്തിയവരില്‍ നാല്‍പ്പത്തി ആറായിരം പേര്‍ ഉടന്‍ രാജ്യം വിടുമെന്നും അദ്ദേഹം പറഞ്ഞു.

'നിയമലംഘകരില്ലാത്ത രാജ്യം' എന്ന ലേബലില്‍ മാര്‍ച്ച് 29 നാണു മൂന്നു മാസത്തെ പൊതുമാപ്പ് സഊദി പ്രഖ്യാപിച്ചത്. കൂടുതല്‍ പേര്‍ മുന്നോട്ടു വന്ന സാഹചര്യത്തില്‍ പിന്നീട് ഒരു മാസം കൂടി നീട്ടി നല്‍കിയിരുന്നു. ഇതോടെയാണ് ഏഴ് ലക്ഷത്തിലേറെ പേര്‍ക്ക് ഇളവുകാലം ഉപയോഗപ്പെടുത്താനായത്.

പിഴയും തടവും കൂടാതെ രാജ്യം വിടാം എന്നതിന് പുറമെ സഊദിയിലേക്ക് പുതിയ വിസയില്‍ തിരിച്ചുവരുന്നതിന് വിലക്ക് ഏര്‍പ്പെടുത്താതെയുമാണ് പൊതുമാപ്പ് പ്രഖ്യാപിച്ചിരുന്നത്. പതിനായിരത്തിലേറെ പേരാണ് ഇത്തരത്തില്‍ പുതിയ വിസയില്‍ വീണ്ടും എത്തിയത്.

ജൂലൈ 24ന് അവസാനിച്ച പൊതുമാപ്പ് കാലത്ത് എക്‌സിറ്റ് വാങ്ങി രാജ്യം വിടാതെ അവശേഷിക്കുന്നവര്‍ ഉടന്‍ രാജ്യം വിടണമെന്നും പാസ്‌പോര്‍ട്ട് ഡയറക്ടറേറ്റ് മേധാവി നിര്‍ദേശിച്ചു. പൊതുമാപ്പിന് ശേഷം അനധികൃത താമസക്കാരെ കണ്ടെത്തുന്നതിന് ശക്തമായ പരിശോധനയാണ് രാജ്യത്തിന്റെ വിവിധയിടങ്ങളില്‍ നടക്കുന്നത്.

ഇന്ത്യക്കാരില്‍ അന്‍പതിനായിരത്തോളം പേര്‍ മാത്രമാണ് ഇളവ് പ്രയോജനപ്പെടുത്തി നാട്ടിലേക്ക് മടങ്ങിയത്. നിയമ ലംഘകരായ ഇന്ത്യക്കാരില്‍ ബഹുഭൂരിഭാഗം പേരും പൊതുമാപ്പ് ഉപയോഗപ്പെടുത്തിയതായാണ് എംബസിയുടെയും സാമൂഹ്യ പ്രവര്‍ത്തകരുടെയും വിലയിരുത്തല്‍.