ചേര്‍ത്തല (ആലപ്പുഴ ): ബ്ലേഡ് പലിശക്കാരന്റെ ശല്യം സഹിക്കാനാവാതെ ഗൃഹനാഥന്‍ ആത്മഹത്യ ചെയ്തു. ചേന്നംപള്ളിപ്പുറം പഞ്ചായത്തിലെ തിരുനല്ലൂര്‍ വല്യപാറയില്‍ പരേതനായ ഹരിദാസിന്റേയും ഓമനയുടേയും മകന്‍ അജിത് (48)ആണ് മരിച്ചത്. വ്യാഴാഴ്ച രാത്രിയോടെയാണ് അജിത്തിനെ കിടപ്പുമുറിയില്‍ തൂങ്ങിമരിച്ച നിലയില്‍ വീട്ടുകാര്‍ കണ്ടെത്തിയത്.
സംഭവത്തെക്കുറിച്ച് പൊലിസ് പറയുന്നതിങ്ങനെ: കയര്‍ വ്യാപാരിയായിരുന്ന അജിത് 2012 ല്‍ എഴുപുന്ന സ്വദേശി ഉലഹന്നാനില്‍ നിന്ന് 3 ലക്ഷം രൂപ പലിശയ്ക്ക് വാങ്ങിയിരുന്നു. ഇടായി അഞ്ച് ലക്ഷത്തിന്റെ ചെക്കും നല്‍കിയിരുന്നു. സാമ്പത്തിക പരാധീനതമൂലം അജിത്തിന് പണം മടക്കി നല്‍കാന്‍ കഴിയാതെ വന്നു. ഈ സാഹചര്യത്തില്‍ ഉലഹന്നാന്‍ ചെക്ക് കോടതിയില്‍ ഹാജരാക്കി. തുടര്‍ന്ന് ജപ്തി നടപടിയിലേക്ക് നീങ്ങുകയായിരുന്നു. ബ്ലേഡുകാരന്റെ ഭീഷണിമൂലം രണ്ടാഴ്ച മുന്‍പും അജിത് ആത്മഹത്യയ്ക്ക് ശ്രമിച്ചിരുന്നു.
വീട്ടുകാര്‍ കണ്ടതുകൊണ്ടാണ് അന്ന് രക്ഷിക്കാനായത്. പിന്നീട് അടുത്തദിവസം വാര്‍ഡ് മെമ്പര്‍ ഹരിക്കുട്ടനും അജിത്തിന്റെ സഹോദരന്‍ സജിത്തും ഉള്‍പ്പെടുന്ന സംഘം ഉലഹന്നാനെ ചെന്നുകണ്ടിരുന്നു. വസ്തു കടപ്പെടുത്തി 9 ലക്ഷം രൂപാ തരാമെന്നുപറഞ്ഞിട്ടും ഇയാള്‍ വഴങ്ങിയില്ല. ജപ്തിയുടെ ഭാഗമായി വെള്ളിയാഴ്ച വീടും സ്ഥലവും അളന്നു തിട്ടപ്പെടുത്താന്‍ കോടതിയില്‍ നിന്ന് ആമീനും സംഘവും വരുമെന്ന വിവരം ലഭിച്ച ഘട്ടത്തിലാണ് അജിത് ആത്മഹത്യ ചെയ്തതെന്ന് ബന്ധുക്കള്‍ പറഞ്ഞു. തന്റെ മരണത്തിന് ഉത്തരവാദി ഉലഹന്നാനാണെന്ന് കുറിപ്പെഴുതി വച്ചിട്ടുണ്ടായിരുന്നു.
ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ പോസ്റ്റ്‌മോര്‍ട്ടത്തിനുശേഷം ഇന്നലെ വൈകിട്ട് വന്‍ജനാവലിയുടെ സാന്നിധ്യത്തില്‍ മൃതദേഹം വീട്ടുവളപ്പില്‍ സംസ്‌കരിച്ചു.

പലിശക്കാരന്‍ കസ്റ്റഡിയില്‍

ചേര്‍ത്തല: ബ്ലേഡ് പലിശക്കാരന്റെ ഭീഷണിയെ തുര്‍ന്ന് അജിത് ആത്മഹത്യ ചെയ്ത കേസില്‍ എരമല്ലൂര്‍ സ്വദേശി ഉലഹന്നാനെ (69) പൊലിസ് കസ്റ്റഡിയിലെടുത്തു. മരണത്തിന് ഉത്തരവാദി ഉലഹന്നാനാണെന്ന് എഴുതിയ ഏഴ് കത്തുകള്‍ ലഭിച്ചതായും ഇതേ തുടര്‍ന്നാണ് പ്രതിയെ പിടികൂടിയതെന്നും എസ്.ഐ സി.സി പ്രതാപചന്ദ്രന്‍ പറഞ്ഞു.