ന്യൂഡല്‍ഹി: ബിഹാര്‍ മുഖ്യമന്ത്രി നിതീഷ് കുമാറിന്റെ നേതൃത്വത്തിലുള്ള ജെ.ഡി.യു എന്‍.ഡി.എയില്‍ ചേര്‍ന്നു. പട്‌നയില്‍ ചേര്‍ന്ന എന്‍.ഡി.എ ദേശീയ പ്രതിനിധി സമ്മേളനത്തിലാണ് ജെ.ഡി.യു ഔദ്യോഗികമായി സഖ്യത്തിന്റെ ഭാഗമായത്. നാലു വര്‍ഷങ്ങള്‍ക്കു ശേഷമാണ് ജെ.ഡി.യു വീണ്ടും സഖ്യത്തിലേക്ക് തിരികെയെത്തുന്നത്. എന്‍.ഡി.എ പ്രവേശനത്തോടെ ജെ.ഡി.യുവിന് കേന്ദ്രമന്ത്രിസഭയില്‍ ഇടം ലഭിക്കും.

ബി.ജെ.പി ദേശീയ അധ്യക്ഷന്‍ അമിത് ഷാ കഴിഞ്ഞ ദിവസം ജെ.ഡി.യുവിനെ എന്‍.ഡി.എയിലേക്ക് ക്ഷണിച്ചിരുന്നു. 2014 ലെ ലോക്‌സഭാ തെരഞ്ഞെടുപ്പില്‍ നരേന്ദ്രമോദിയെ പ്രധാനമന്ത്രി സ്ഥാനാര്‍ഥിയാക്കിയതില്‍ പ്രതിഷേധിച്ചാണ് ജെ.ഡി.യു എന്‍.ഡി.എ പാളയത്തില്‍ നിന്നും പുറത്തുവന്നത്. തുടര്‍ന്ന് ആര്‍.ജെ.ഡിയുമായി ചേര്‍ന്ന് ഭരണം നിലനിര്‍ത്തി.

അതേസമയം, നിതീഷിന്റെ നിലപാടിനെ പാര്‍ട്ടി മുന്‍ അധ്യക്ഷനും രാജ്യസഭാംഗവുമായ ശരദ് യാദവ് രൂക്ഷ വിമര്‍ശനവുമായി രംഗത്തെത്തിയിരുന്നു.