മാഡ്രിഡ്: ബാഴ്‌സലോണയില്‍ ആളുകള്‍ക്കിടയിലേക്ക് വാനിടിച്ചുകയറ്റിയ സംഭവത്തില്‍ പ്രതിയെന്ന് സംശയിക്കുന്ന 22 കാരന്റെ ചിത്രം പൊലിസ് പുറത്തുവിട്ടു. ഇയാളെ കണ്ടെത്താന്‍ തെരച്ചില്‍ ഊര്‍ജിതമാക്കി. മൊറോക്കന്‍ വംശജനായ അബൂ അയ്യൂബ് ആണ് പ്രതിയെന്ന് സ്പാനിഷ് മാധ്യമങ്ങള്‍ റിപ്പോര്‍ട്ട് ചെയ്തു.
ഇയാള്‍ നിരവധി ആക്രമണങ്ങള്‍ക്ക് പദ്ധതിയിട്ടുവെന്ന് പൊലിസ് പറഞ്ഞു. കഴിഞ്ഞ ദിവസം അല്‍കാനറിലെ വീട്ടിലുണ്ടായ സ്‌ഫോടനത്തിലും ഒരാള്‍ കൊല്ലപ്പെട്ടിരുന്നു. ഇത് ബോംബ് നിര്‍മാണത്തിനിടെയാണെന്ന് പൊലിസ് സ്ഥിരീകരിച്ചു. വാഹനത്തില്‍ ബോംബ് ഘടിപ്പിച്ച് സ്‌ഫോടനം നടത്താനായിരുന്നു ഇവരുടെ പദ്ധതിയെന്നും പൊലിസ് പറഞ്ഞു.
ബാഴ്‌സലോണയിലെ വടക്കന്‍ നഗരമായ റിപ്പോളിലാണ് അയ്യൂബ് താമസിക്കുന്നത്. റിപ്പോളില്‍ വച്ച് മൂന്നു പേരെയും അല്‍കാനറില്‍ ഒരാളെയും അറസ്റ്റ് ചെയ്തു. ഇയാളെ സംഭവം നടന്നതുമുതല്‍ പൊലിസ് സംശയിച്ചിരുന്നു.
എന്നാല്‍ വെള്ളിയാഴ്ച പൊലിസ് മേധാവി ജോസെഫ് തരാപെറോ ആണ് പ്രതിയെ സ്ഥിരീകരിച്ചത്. മെലിഞ്ഞയാളാണ് പ്രതിയെന്ന് പലരും മൊഴി നല്‍കിയിരുന്നു.
ഇയാള്‍ പ്രതിയെന്ന് സ്ഥിരീകരിച്ചതായി എല്‍ പെയ്‌സ് പത്രം റിപ്പോര്‍ട്ട് ചെയ്തു. സഹോദരന്റെ തിരിച്ചറിയല്‍ രേഖകളും മറ്റും ഉപയോഗിച്ചാണ് ഇയാള്‍ വാഹനം വാടകക്കെടുത്തത്. സഹോദകരനെയും നേരത്തെ ചോദ്യം ചെയ്തിരുന്നു.