പയ്യോളി: ഫുഡ് കോര്‍പറേഷന്‍ ഓഫ് ഇന്ത്യ തിക്കോടി ഡിപ്പോയില്‍നിന്ന് മൂന്നാം ദിവസവും റേഷന്‍ വിതരണം മുടങ്ങി.
കരാര്‍ തൊഴിലാളികളെ പിരിച്ചുവിട്ടതില്‍ പ്രതിഷേധിച്ച് തൊഴിലാളികള്‍ ഇന്നലെയും എഫ്.സി.ഐക്ക് മുന്നില്‍ ഉപരോധം നടത്തി. സംഭവവുമായി ബന്ധപ്പെട്ട് എഫ്.സി.ഐ ഏരിയാ മാനേജര്‍ തിക്കോടിയില്‍ എത്തുമെന്ന് അറിയിപ്പുണ്ടായെങ്കിലും എത്തിയില്ല.
അതിനിടെ തിക്കോടി എഫ്.സി.ഐയിലെ തൊഴില്‍ പ്രശ്‌നവുമായി ബന്ധപ്പെട്ട് ജില്ലാ ലേബര്‍ ഓഫിസര്‍ ട്രേഡ് യൂനിയന്‍ നേതാക്കളെ ചര്‍ച്ചയ്ക്ക് വിളിക്കാനുള്ള ശ്രമങ്ങള്‍ ആരംഭിച്ചിട്ടുണ്ട്. ഓണം-ബക്രീദ് അടുത്തെത്തി നില്‍ക്കുന്ന അവസരത്തില്‍ അനുകൂല നിലപാട് സ്വീകരിക്കാത്ത മാനേജ്‌മെന്റിനെതിരേ തൊഴിലാളികളും നാട്ടുകാരും പ്രതിഷേധത്തിലാണ്.
എഫ്.സി.ഐക്ക് മുന്നില്‍ തൊഴിലാളികള്‍ നടത്തുന്ന ഉപരോധ സമരത്തിന് പിന്തുണയുമായി കൂടുതല്‍ പേര്‍ എത്തുന്നുണ്ട്. കെ. ദാസന്‍ എം.എല്‍.എ, പി. വിശ്വന്‍, സന്തോഷ് തിക്കോടി, ടി. ഖാലിദ്, സി. കുഞ്ഞമ്മദ്, പി.വി അസീസ്, ടി. ഷീബ, ബിജു കളത്തില്‍, ബാബുരാജ്, പി. ജനാര്‍ദനന്‍ അഭിവാദ്യമര്‍പ്പിച്ച് സംസാരിച്ചു.