എടച്ചേരി: രാജ്യത്ത് വര്‍ധിച്ചു കൊണ്ടിരിക്കുന്ന ഫാസിസ്റ്റ് ഭീകരതക്കും അധികാര ദുര്‍വിനിയോഗത്തിനുമെതിരേ യോജിച്ച മുന്നേറ്റം അനിവാര്യമാണെന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍. ഏറാമല പഞ്ചായത്ത് മുസ്‌ലിം ലീഗ് കമ്മറ്റി ഓര്‍ക്കാട്ടേരി ശിവക്ഷേത്ര പരിസരത്ത് സരസ്വതിക്ക് നിര്‍മിച്ചു നല്‍കിയ കാരുണ്യ ഭവനത്തിന്റെ സമര്‍പ്പണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ദലിതുകള്‍ക്കും ന്യൂനപക്ഷ ജനവിഭാഗങ്ങള്‍ക്കുമെതിരേ രാജ്യത്ത് നടന്നുകൊണ്ടിരിക്കുന്ന അക്രമ പ്രവര്‍ത്തനങ്ങളും നീതി നിഷേധവും രാജ്യത്തിന്റെ പുരോഗതിക്കും വികസനത്തിനും വിഘാതം സൃഷ്ടിക്കുമെന്നും അദ്ദേഹം പറഞ്ഞു.
ജാതി, മത, രാഷ്ട്രീയ ചിന്തകള്‍ക്കും താല്‍പ്പര്യങ്ങള്‍ക്കും അധീതമായി അവശത അനുഭവിക്കുന്നവര്‍ക്കിടയില്‍ നടത്തിവരുന്ന ജീവകാരുണ്യ പ്രവര്‍ത്തനങ്ങള്‍ സ്വാഗതാര്‍ഹവും മാതൃകാപരമാണെന്നും തങ്ങള്‍ കൂട്ടിച്ചേര്‍ത്തു.
കെ.കെ കുഞ്ഞമ്മദ് അധ്യക്ഷനായി. പാറക്കല്‍ അബ്ദുല്ല എം.എല്‍.എ, പഞ്ചായത്ത് പ്രസിഡന്റ് എം.കെ ഭാസ്‌കരന്‍, പി.പി അന്‍വര്‍ സാദത്ത്, പുത്തൂര്‍ അസീസ്, ഒ.കെ കുഞ്ഞബ്ദുല്ല,റിയാസ് പുല്‍പ്പറ്റ ,ഒ.കെ ഇബ്രാഹിം, ക്രസന്റ് അബദുല്ല, ശുഹൈബ് കുന്നത്ത്, ഹാഫിസ് മാതാഞ്ചേരി, അഫ്‌നാസ് ചോറോട്, ടി.പി ഗഫൂര്‍, ഒ.പി മൊയ്തു സംസാരിച്ചു. മുസ്‌ലിം ലീഗ് നേതവ് പി. സൂപ്പി ഹാജിയെ യോഗത്തില്‍ ആദരിച്ചു. സി.പി.എമ്മില്‍ നിന്ന് രാജിവച്ച താജുദ്ധീന്‍ ഏറാമലക്ക് ഹൈദരലി തങ്ങള്‍ മെംബര്‍ഷിപ്പ് നല്‍കി.