കൊണ്ടോട്ടി: സ്വകാര്യ വ്യക്തിയുടെ റോഡ് കൈയേറ്റത്തില്‍ പ്രതിഷേധിച്ച് പുളിക്കല്‍ പഞ്ചായത്ത് 2,3 വാര്‍ഡ് ഗ്രാമസഭകള്‍ നിര്‍ത്തിവച്ചു. ഒളവട്ടൂര്‍ കോഴിപ്പടി ചക്കുംപൂള ചെറുവട്ടൂര്‍ റോഡാണ് സ്വകാര്യ വ്യക്തി കൈയേറിയത്. നടപടിയില്ലാത്തതില്‍ പ്രതിഷേധിച്ച വെള്ളി, ശനി ദിവസങ്ങളില്‍ നടന്ന ഗ്രാമസഭകള്‍ നാട്ടുകാര്‍ ബഹിഷ്‌കരിച്ചു.
കോഴിപ്പടി ഭാഗത്ത് റോഡിലേക്ക് സ്വകാര്യ വ്യക്തി മതില്‍ ഇറക്കിക്കെട്ടിയ നിലയിലാണ്. ഇതില്‍ പ്രതിഷേധിച്ച് നാട്ടുകാര്‍ പഞ്ചായത്ത് സെക്രട്ടറിക്ക് പരാതി നല്‍കിയെങ്കിലും റോഡ് പഞ്ചായത്ത് ആസ്തി റജിസ്റ്ററില്‍ ഉള്‍പ്പെടാത്തതാണെന്നും പറഞ്ഞ് നടപടിയെടുക്കാന്‍ മടിക്കുകയായിരുന്നുവെന്ന് നാട്ടുകാര്‍ പറയുന്നു.
എന്നാല്‍ പിന്നീട് നടത്തിയ പരിശോധനയില്‍ 8 മീറ്റര്‍ വീതിയുള്ള റോഡ് ആസ്തി റജിസ്റ്ററില്‍ ഉള്‍പ്പെട്ടതാണെന്ന് കണ്ടെത്തിയതായും നാട്ടുകാര്‍ പറഞ്ഞു. മൂന്നാം വാര്‍ഡ് അംഗത്തിന്റെ നേതൃത്വത്തിലായിരുന്നു പരിശോധന നടന്നത്.
റോഡില്‍ പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് ഫണ്ടുകള്‍ ചിലവഴിച്ച് പല തവണ നിര്‍മാണ പ്രവൃത്തികള്‍ നടന്നിട്ടുണ്ട്. റോഡിന്റെ 500 മീറ്റര്‍ പുളിക്കല്‍ പഞ്ചായത്തിലും ശേഷിക്കുന്ന ഭാഗം വാഴക്കാട് പഞ്ചായത്ത് പരിധിയിലാണ് ഉള്‍പ്പെടുന്നത്.പഞ്ചായത്ത് ആസ്തി റജിസ്റ്ററില്‍ എട്ടു മീറ്റര്‍ റോഡ് ഉണ്ടായിട്ടും കൈയേറ്റം നടത്തുന്നവരെ സംരക്ഷിക്കുന്ന നിലപാടാണ് സെക്രട്ടറി കൈക്കൊള്ളുന്നതെന്നാരോപിച്ചാണ് വെള്ളിയാഴ്ച നടന്ന മൂന്നാം വാര്‍ഡ് ഗ്രാമസഭയും ശനിയാഴ്ച നടന്ന രണ്ടാം വാര്‍ഡ് ഗ്രാമസഭയും നാട്ടുകാര്‍ ബഹിഷ്‌കരിച്ചത്. പ്രശ്‌നത്തില്‍ അടിയന്തരമായി നടപടിയെടുത്തില്ലെങ്കില്‍ ശക്തമായ പ്രക്ഷോഭങ്ങള്‍ സംഘടിപ്പിക്കാനാണ് പ്രദേശവാസികളുടേയും മേഖലയിലെ രാഷ്ട്രീയപാര്‍ട്ടി പ്രതിനിധികളുടേയും തീരുമാനം.