മീനങ്ങാടി: അമ്പലവയല്‍ മേഖലാ കാര്‍ഷികഗവേഷണ കന്ദ്രത്തില്‍ നടന്ന അന്താരാഷ്ട്ര ചക്ക മഹോത്സവത്തിലെ ചെറുകിട ചക്ക സംസ്‌കരണ മെഷിനറികളുടെ മത്സരത്തില്‍ മീനങ്ങാടി ഗവ. ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികളായ സാഗാ പി.എസ്, സുധിന്‍ എം.എസ്, ഇവ്‌ലിന്‍ മരിയ, അനുബേബി, ആഷ്‌ലിന്‍ അജി എന്നിവരുടെ ടീം ഒന്നാം സമ്മാനമായ രണ്ടുലക്ഷം രൂപയും പ്രശസ്തി പത്രവും നേടി.
ചക്ക എളുപ്പത്തില്‍ മുറിച്ച് പാകപ്പെടുത്തുന്നതിനും ചക്കക്കുരുവിന്റെ പുറംതോല്‍ എളുപ്പത്തില്‍ നീക്കം ചെയ്യുന്നതിനും ഇവര്‍ തയ്യാറാക്കിയ ലഘുയന്ത്രങ്ങള്‍ വിദേശ രാജ്യങ്ങളില്‍ നിന്നെത്തിയ ഡെലിഗേറ്റുകളുടെ പ്രത്യേക പ്രശംസക്കും പാത്രമായി.
സ്‌കൂള്‍ അധ്യാപകരായ പി.ടി സജീവന്‍, ടി.ജി സജി എന്നിവരാണ് വിദ്യാര്‍ഥികള്‍ക്ക് ആവശ്യമായ മാര്‍ഗനിര്‍ദേശങ്ങള്‍ നല്‍കിയത്. സമ്മാനാര്‍ഹരായ വിദ്യാര്‍ഥികളെ സ്‌കൂള്‍ പി.ടി.എയും സ്റ്റാഫ് കൗണ്‍സിലും അനുമോദിച്ചു. പ്രിന്‍സിപ്പല്‍ സി.കെ ഷാജി, പി.ടി.എ പ്രസിഡന്റ് ടി.എം ഹൈറുദ്ദീന്‍, എസ്.എം.സി ചെയര്‍മാന്‍ മനോജ് ചന്ദനക്കാവ്, അധ്യാപകരായ ഷിവി എം.കെ, പി.റ്റി ജോസ് സംസാരിച്ചു.