പേരാമ്പ്ര: പൊതുപ്രവര്‍ത്തനത്തിനിടയിലും കരനെല്‍ കൃഷിയില്‍ നൂറുമേനി വിളയിച്ച് ആശാ വര്‍ക്കര്‍. കോട്ടൂര്‍ ഗ്രാമപഞ്ചായത്തിലെ ഈ വര്‍ഷത്തെ മികച്ച ജൈവകര്‍ഷകയായി തിരഞ്ഞെടുത്ത ആശാ വര്‍ക്കര്‍ നരയംകുളത്തെ തണ്ടപ്പുറത്തുമ്മല്‍ ഉഷയാണ് (48) അപൂര്‍വനേട്ടം സ്വന്തമാക്കിയത്.

പുരയിടത്തില്‍ കരനെല്‍കൃഷി ഉള്‍പ്പെടെ നടത്തിയാണ് മികച്ച കര്‍ഷകയ്ക്കുള്ള അംഗീകാരത്തിന് അവര്‍ അര്‍ഹയായത്. രണ്ടിടത്തായി അര ഏക്കറോളം സ്ഥലത്ത് നെല്‍കൃഷിയുണ്ട്. കൂടാതെ വിവിധ തരം ചേമ്പ്, ചേന, ഇഞ്ചി, മഞ്ഞള്‍, ഉള്‍പ്പെടെയുള്ള ഇടവിളകൃഷിയും നല്ലനിലയില്‍ നടത്തിവരുന്നു. കഴിഞ്ഞ വര്‍ഷങ്ങളില്‍ ഭൂമി പാട്ടത്തിനെടുത്ത് പച്ചക്കറി കൃഷിയും നടത്തിയിരുന്നു.

ചാണകം, വേപ്പിന്‍ പിണ്ണാക്ക് ഉള്‍പ്പെടെയുള്ള വളങ്ങളാണ് കൃഷിക്ക് ഉപയോഗിക്കുന്നത്. മത്തിയും ശര്‍ക്കരയും ഉപയോഗിച്ചുണ്ടാക്കുന്ന ഫിഷ് അമിനോ ആസിഡ്, കോഴിമുട്ടയും ചെറുനാരങ്ങയും ഉപയോഗിച്ചുണ്ടാക്കുന്ന എഗ് അമിനോ ആസിഡ് എന്നിവയാണ് കീടനാശിനിയായി ഉപയോഗിക്കുന്നത്.

കൃഷിഭവനില്‍ നിന്നു ലഭിച്ച നെല്‍വിത്ത് ഉപയോഗിച്ചാണ് കൃഷി. പൊലിസ് സബ്ഇന്‍സ്‌പെക്ടറായി വിരമിച്ച ഭര്‍ത്താവ് ടി.പി രവീന്ദ്രന്‍ കാര്‍ഷിക വൃത്തിയില്‍ ഉഷയെ സഹായിക്കുന്നുണ്ട്. ജൈവകര്‍ഷകന്‍ എ. ദിവാകരന്‍ നായരാണ് മാര്‍ഗനിര്‍ദേശം നല്‍കുന്നത്.
ആരോഗ്യ പ്രവര്‍ത്തനത്തിനിടയില്‍ മിച്ചം വരുന്ന സമയം പ്രയോജനപ്പെടുത്തി കൃഷിയിലൂടെ ഉഷ അംഗീകാരം നേടിയെടുത്തത് നാടിന് പുതിയ മാതൃകയായി.