അരീക്കോട്: റോഡ് നിര്‍മാണത്തിലെ അശാസ്ത്രീയത കാരണം വാഹനങ്ങള്‍ നടുറോഡില്‍ കുടുങ്ങുന്നത് പതിവാക്കുന്നു. അരീക്കോട് - തിരൂര്‍ക്കാട് സംസ്ഥാന പാതയില്‍ കിളിക്കല്ലിങ്ങല്‍ റോഡിലെ കയറ്റമാണ് വാഹനങ്ങള്‍ക്ക് തീരാദുരിതമായി മാറിയിരിക്കുന്നത്. റോഡില്‍ കുത്തനെയുള്ള കയറ്റം വലിയ പ്രയാസമാണ് സൃഷ്ടിക്കുന്നത്. അരീക്കോട് ഭാഗത്ത് നിന്ന് വരുന്ന വാഹനങ്ങള്‍ കുത്തനെയുള്ള കയറ്റത്തില്‍ കുടുങ്ങുന്നത് പതിവായിരിക്കുകയാണ്.
ബസുകളും ചരക്ക് വാഹനങ്ങളുമാണ് ഏറെയും കയറ്റം കയറാനാവാതെ നടുറോഡില്‍ കുടുങ്ങേണ്ടി വരുന്നത്. ഇത് കാരണം ഗതാഗത തടസവും അനുഭവപ്പെടുന്നു. കഴിഞ്ഞ ദിവസം ഒരു ചരക്കുലോറിയും കെ.എസ്.ആര്‍.ടി.സി ബസും റോഡില്‍ കുടുങ്ങിയിരുന്നു.
രാത്രി കാലങ്ങളില്‍ ഭീമന്‍ ലോഡുകളുമായി വരുന്ന ചരക്ക് ലോറികള്‍ നടുറോഡില്‍ കുടുങ്ങിയാല്‍ മണിക്കൂറുകള്‍ക്ക് ശേഷമാണ് വാഹനം നീക്കം ചെയ്ത് ഗതാഗതം പുനഃസ്ഥാപിക്കാനാകുന്നത്. ഈ സമയം ചെങ്ങര ഇളയൂര്‍ കാവനൂര്‍ ഭാഗങ്ങളില്‍ നിന്ന് കോഴിക്കോട് മെഡിക്കല്‍ കോളജ് ലക്ഷ്യമാക്കി വരുന്ന ആംബുലന്‍സ് പോലും വഴിയില്‍ കുടുങ്ങി കിടക്കേണ്ട അവസ്ഥയാണുള്ളത്.
കയറ്റത്തില്‍ കുടുങ്ങി കിടക്കുന്ന വാഹനങ്ങളെ മറികടന്ന് അമിത വേഗതയില്‍ വരുന്ന വാഹനങ്ങള്‍ കൊടും വളവില്‍ അപകടത്തില്‍പ്പെടുന്നതും പതിവായിരിക്കുകയാണ്. റോഡിന്റെ താഴെ ഭാഗം മുതല്‍ ഉയര്‍ത്തിക്കെട്ടി കുത്തനെയുള്ള കയറ്റം ഇല്ലാതാക്കിയാല്‍ മാത്രമെ ഗതാഗത തടസത്തിനും തുടരെയുള്ള അപകടങ്ങള്‍ക്കും പരിഹാരം കാണാനാവുകയുള്ളു.