നെന്മാറ: സാമൂഹ്യ പുരോഗതിക്ക് പൊതുവിദ്യാഭ്യാസ മേഖലയുടെ വികസനം അനിവാര്യമാണെന്ന് പി.കെ ബിജു എം.പി ഇന്‍സ്‌പെയര്‍ അറ്റ് സ്‌കൂള്‍ പദ്ധതി പ്രകാരം നെന്മാറ ഗവ. ഗേള്‍സ് ഹയര്‍ സെക്കന്‍ഡറി സ്‌കൂളിലേക്ക് വാങ്ങി നല്‍കിയ ബസിന്റെ ഫ്‌ളാഗ് ഓഫ് നിര്‍വഹിച്ച് സംസാരിക്കുകയായിരുന്നു എം.പി.
ഇന്‍സ്‌പെയര്‍ അറ്റ് സ്‌കൂള്‍ പദ്ധതിയില്‍ നിന്ന് ആലത്തൂര്‍ പാര്‍ലിമെന്റ് മണ്ഡലത്തിലെ പൊതുവിദ്യാഭ്യാസ സ്ഥാപനങ്ങളില്‍ പ്രാദേശിക വികസന ഫണ്ടില്‍ നിന്നും 421.15 ലക്ഷം രൂപയുടെ വികസനം നടപ്പിലാക്കിയെന്നും എം.പി ചടങ്ങില്‍ പറഞ്ഞു. പൊതുവിദ്യാഭ്യാസ സ്ഥാപനങ്ങള്‍ മികവിന്റെ കേന്ദ്രങ്ങളാക്കുന്നതിന് ആലത്തൂര്‍ പാര്‍ലിമെന്റ് മണ്ഡലത്തില്‍ പ്രാദേശിക വികസന ഫണ്ടുപയോഗിച്ച് എം.പി നടപ്പാക്കുന്ന പദ്ധതിയാണ് ഇന്‍സ്‌പെയര്‍ അറ്റ് സ്‌കൂള്‍. 15 ലക്ഷം രൂപയാണ് പ്രാദേശിക വികസന ഫണ്ടില്‍ നിന്നും ബസ് വാങ്ങുന്നതിനായി എം.പി അനുവദിച്ചത്. നേരത്തെ നെന്മാറ ഗവ. ബോയ്‌സ് സ്‌കൂളിനും എം.പി ബസ് വാങ്ങിനല്‍കിയിരുന്നു. യാത്രക്ലേശമില്ലാതെ വിദ്യാര്‍ഥിനികള്‍ക്ക് കൃത്യസമയത്ത് സ്‌കൂളില്‍ എത്തിച്ചേരുന്നതിനും ആവശ്യമായ സൗകര്യങ്ങള്‍ ഒരുക്കുന്നതിനാണ് എം.പി ബസ് വാങ്ങി നല്‍കിയത്.
1925 ലാണ് ഗവ.ഗേള്‍സ് സ്‌കൂളിന്റെ പ്രവര്‍ത്തനം ആരംഭിച്ചത്. ഹൈസ്‌ക്കൂള്‍, ഹയര്‍സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി വിഭാഗങ്ങളിലായി 2243 വിദ്യാര്‍ഥികള്‍ ഇവിടെ പഠിക്കുന്നുണ്ട്. പ്രിന്‍സിപ്പല്‍ ഉഷാകുമാരി അധ്യക്ഷയായി. ബി. വിനോദ്കുമാര്‍ റിപ്പോര്‍ട്ട് അവതരിപ്പിച്ചു. ബ്ലോക്ക് മെമ്പര്‍ കെ. ദേവദാസ്, വാര്‍ഡ് മെമ്പര്‍ ആര്‍. മുരളീധരന്‍, പി.ടി.എ പ്രസിഡന്റ് എ. പ്രഭാകരന്‍, വി.എച്ച്.എസ്.ഇ പ്രിന്‍സിപ്പല്‍ വി.എം നിഷ, പ്രധാനാധ്യാപിക വി. ലേഖ, സ്റ്റാഫ് സെക്രട്ടറി എം.പി.മുരുകദാസ് സംസാരിച്ചു.